Diretór Jerál Ministériu Edukasaun Ensiñu Sekundáriu Jerál ho Tékniku Vokasionál, Luís da Costa Fernandes. Imajen Mídia MEJD

DILI, 09 maiu 2019 (TATOLI)—Governu liuhosi Ministériu Edukasaun, Juventude no Desportu (MEJD), sei selu profesór kontratadu sira iha maiu nia laran, tinan ida ne’e.

Profesór kontratadu hosi ensiñu sekundáriu jerál ho ensiñu tékniku vokasionál hamutuk atus-rua resin durante fulan haat ona la simu saláriu. Hahú hosi janeiru 2019 to’o oras ne’e.

“Hosi janeiru to’o agora sira seidauk simu saláriu, tanba iha prosesu mudansa bens serbisu. Maibé ida ne’e prosesu tomak liu hotu ona, aprova no iha ona parte kompetente,” Diretór Jerál Ensiñu Sekundáriu Jerál no Tékniku Vokasionál, Luís da Costa Fernandes, ba jornalista sira iha Vila-Verde, kinta (9/5/2019).

Tuir informasaun ne’ebé Diretór Jerál Ensiñu Sekundáriu Jerál no Tékniku Vokasionál ne’e asesu hosi funsionáriu sira ne’ebé halo prosedimentu ba prosesu ne’e katak maiu nia laran simu ona.

“Iha maiu nia laran ligadu ba pagamentu, bele selu ona. Klaru katak maiu bele tama ona ba sira-nia konta bankária,” Luís esplika.

Nia informa, uluk serbisu ho bens serbisu, maibé mudansa no selu fali hosi osan saláriu, entaun Ministériu Edukasaun liuhosi rekursu hamutuk ho Funsaun Públika halo ona koordenasaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here