Ministru Reforma Lejizlativa no asuntu Parlamentár, Fidelis Manuel Leite Magalhães. Imajen Egas Cristóvão

DILI, 9 maiu 2019 (TATOLI)—Ministru Reforma Lejizlativa no asuntu Parlamentár, Fidelis Manuel Leite Magalhães, ne’ebé reprezenta Primeiru-Ministru, Taur Matan Ruak, hateten governu seidauk iha intensaun atu regula mídia sosiál (medsos) ba fake news (informasaun falsu) ho intensaun ka konotasaun atu hamate demokrasia no liberdade espresaun.

“Pontu primeiru maka ha’u seiduak dehan regula mídia sosiál ho intensaun ka konotasaun atu hamate demokrasia no liberdade espresaun ne’ebé ita-boot sira kestiona. Ha’u dehan iha diskusaun iha nível mundiál globál iha relasaun ho uzu ba plataforma mídia sosiál sira nian. Se ita ko’alia regulamentu karik, iha futuru, regulamentu tenke aberta direitu fundamentál sidadaun nian atu espresa nia hanoin atu hetan asesu ba informasaun,” dehan Ministru Reforma Lejizlativa no Asuntu Parlamentár, Fidelis Leite Magalhães, iha entrevista ba jornalista sira iha konferénsia internasionál Dili Diálogu Forum ne’ebé hala’o iha salaun São José Katedrál, Dili, kinta (9/5/2019).

Mídia sosiál, tuir nia, hanesan instrumentu ida de’it iha konstestu boot ida. Tanba ne’e, nia parte la ko’alia dehan atu regula facebook ka bandu fake news tanba governu laiha intensaun ka iluzaun ida atu Timor-Leste kontrola fake news sira ne’ebé habelar hosi mídia sosiál sira.

“Pesoalmente, ha’u ladún preokupa ho fake news ho atake pesoal ba ha’u. Ne’e buat ida  parte ba moris. Tanba ida ne’e maka ohin ha’u ko’alia, tenke haree didi’ak kona-ba direitu privasidade ka devér ba hirak ne’ebé ezerse kargu públiku no direitu sidadaun nian ba ninia naran di’ak,” nia tenik.

Fidelis hatutan, atu halo regulamentu ruma, governu la la’o mesak. Tanba, iha ne’e, governu nia dever atu halo kaulker diskusaun iha área komunikasaun sosiál, informasaun, espresaun, ne’e governu sei la halo sein konsulta ho  Konsellu Imprensa no jornalista sira.

Sei kria lei cyber crime atu regula mídia sosiál, nia hatán, iha ona diskusaun no iha ona ezbosu ba lei cyber maibé lalika ansi liu tanba iha mundu teknolojia avansa lalais liu lei. Dala barak, nia dehan,  lei mai ikus atu regulariza no kontrolu ne’ebé di’ak liu teknolojia ne’ebé esperiénsia hela revolusaun teknolójika.

Entretantu, atu regula mídia sosiál, Konsileiru Konselu Imprensa ba asuntu Dezenvolvimentu Mídia, Hugo Fernandes, afirma iha tinan kotuk Konsellu Imprensa halo ona nota intedimentu ida ho Autoridade Nasionál Komunikasaun (ANC-sigla Portugés) tanba ANC maka fó lisensa ba operadór telekomunikasaun sira.

“Mídia sosiál sira uza plataforma ne’ebé maka kompañia operadór telekomunikasaun sira fornese. Prosesu la’o hela. Hosi ANC halo ona. Ema hotu-hotu tenke rejistu sim card para aban bainrua bele tracking ka bele deskobre sé maka lansa hoax ka fake news,” dehan Hugo liuhusi entrevista ho jornalista Tatoli iha Salaun São José, Katedral, Dili.

Aleinde ida ne’e, nia informa, Konsellu Imprensa mós lansa tiha ona matadalan ba mídia online ne’ebé profisionál. Agora, nia hatutan, konteúdu hosi mídia sosiál ne’e maka tenke hamosu lei ida kona-ba IT (information technology). Atu halo lei IT ne’e, tenke konsulta kle’an para buat ne’e labele impede fali ema nia liberdade espresaun.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here