Ministru Justisa, Manuel Cárceres da Costa. Imajen/Antonio Goncalves

DILI, 09 Maiu 2019 (TATOLI)–Estadu Unidus Amérika liuhosi programa Millennium Challenge Cooperation (MCC) ka Compact Development Team Timor Leste (CDT-TL) sei apoiu governu Timor-Leste atu kria lei ba rezolve konflitu komersiál  durante períodu 2020 -2025.

Ministru Justisa, Manuel Cárceres da Costa hato’o asuntu ne’e hafoin halo enkontru ho Diretór Ezekutivu Nasionál MCC no Compact Development Team Timor-Leste, Constâncio da Conceição Pinto ho ninia ekipa, ohin, iha edifísiu Ministériu Justisa, Caikoli, Dili.

“Sira mai ko’alia ho ha’u  kona-ba programa saida maka sira bele ajuda liuliu lei rezolusaun  ba konflitu komersiál no saida tan maka sira bele ajuda”, hateten Ministru Manuel Cárceres da Costa ba Jornalista sira.

Durante diskusaun, parte rua  seidauk define loloos programa saida maka presiza atu hetan tulun, tanba ne’e ministériu sei submete pedidu ba EUA liuhosi ekipa servisu MCC ka Compact Development Team Timor Leste.

Manuel Cárceres haklaken tan dehan, liuhosi programa MCC ne’e governu Amérika mós sei fó apoiu ba formasaun rekursu umanu ba  juis sira tanba tuir planu iha 2020, ministériu sei haruka timoroan  purvolta na’in 20 sei ba estuda iha Portugal hodi hasai mestradu (S2) iha área diretu  hanesan juis, Prokuradór, defensór públika no ofisiál Justisa.

Tuir Ministru Cárceres, sei haruka mós juizés, Prokuradór, defensór públika,   atu hasai kursu espesialidade iha área diretu komérsiu internasionál iha área brankamentu kapitál.

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here