Komandante Jerál PNTL, Komisáriu Faustinho da Costa ho nia vise Mateus Fernandes. Imajen/António Gonçalves

DILI, 09 maiu (TATOLI)–Durante abril 2019 nia laran, asidente tráfegu hamutuk 370 maka akontese iha territóriu Timor-Leste hodi rezulta vítima na’in lima (5) mate, na’in 40 kanek todan no na’in 101 sofre kanek kamaan. Asidente ne’e ho kategoria hanesan karreta soke malu, baku fila no motór soke malu.

“Iha abril tinan ida ne’e,  iha asidente hamutuk 370 maka mosu. Hosi asidente ne’e, rezulta ema mate na’in lima (5), kanek todan 40 no kanek kaman iha 101,” dehan Komandante Jerál Polísia Nasionál Timor-Leste, Komisáriu Faustinho da Costa ba jornalista sira hafoin hala’o enkontru ho Prezidente Repúblika, Francisco Guterres Lú Olo, kinta (09/05), hodi informa situasaun seguransa territóriu Timor-Leste ba Xefe Estadu.

Nia esplika, asidente sira ne’e akontese tanba problema umanu—dala ruma ema hemu tua lanu la kontrola án no viala regra tránzitu to’o hetan asidente.

Komandante Jerál PNTL ne’e haktuir katak nia parte mós halo diskusaun ho Prezidente Repúblika kona-ba preparasaun seguransa ba eventu restaurasaun independénsia 20 maiu tinan ida ne’e.

Iha enkontru ne’e, Komisáriu Faustinho aprezenta ba Prezidente Repúblika katak situasaun seguransa iha Timor-Leste la’o di’ak maske iha asidente no insidente maibé la implika ba estabilidade nasionál.

Entretantu, Prezidente Repúblika, Francisco Guterres Lú Olo husu atu PNTL kontinua koloka rekursu sufisiente mantein seguransa ho di’ak liu-tan iha rai laran.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here