Reprezentante UNFPA Timor-Leste Olof Ronny Lindstrom (Loos), Embaixadór Japaun iha Timor-Leste, Hiroshi Minami (Karuk) Reprezentante Unicef Timor -Leste Valérie Taton (Klaran), Diretór Jerál Estatistika Ministériu Finansas, Elias dos Santos Ferreira (Karuk), Kinta (9/5/2019), Halo Lansamentu Relatoriu Objetivu Dezenvolvimentu Sustentavel Livru Kona-ba Labarik Timor-Leste 2018. Imajen/Egas Cristovão

DILI, 09 maiu 2019 (TATOLI)-Diresaun Jerál Estatístika (DJE) Ministériu Finansa (MF), ohin, lansa relatóriu rua  kona-ba Objetivu Dezenvolvimentu Sustentavel (ODS), Livru Dadus kona-ba Labarik 2018 no Timor-Leste Birth Registration Baseline Assesment 2018 (Avaliasaun ba Rejistu Moris iha Timor-Leste).

Diretór Jerál Estatístika MF, Elias dos Santos Ferreira, informa, lansamentu ne’ebé halo ne’e, DJE la halo peskiza foun, maibé dadus ne’ebé hetan ne’e mai husi kompilasaun dadus peskiza Timor-Leste nivel moris iha 2014-2015, Sensu Populasaun no Umakain 2015 no mós Peskiza Demografia Saúde iha Timor-Leste 2016.

Elias dos Santos subliña tan, buat importante hosi dokumentu rua ne’e mak iha relatóriu ODS ba labarik hatudu katak husi Objetivu 1-16 ne’e liga ba labarik.

“Liuliu Objetivu 16, Pás, Justisa no Instituisaun Efikás. Ida ne’e liga ba direitu rejistu labarik moris, pur tantu iha nasaun hotu, importante iha Timor-Leste labarik sira ne’e iha direitu ba rejistu”, Elias afirma hafoin lansamentu ba dokumentu rua ne’e iha salaun MF, Ai-Tarak Laran, Dili.

Iha dadus kona-ba Labarik 2018 ne’ebé uza dadus Sensu Populasaun no Umakain 2015, rejistu ein jerál labarik sira entre tinan 0-4 ne’e 60%, maibé ida ne’ebé iha sertifikadu moris ka RDTL ne’e 30%. Ne’e hatudu katak persentajen sei ki’ik, maibé atu halo tan komparasaun ne’e bainhira halo sensu 2020 maka bele halo no pergunta ne’ebé husu iha 2015, husu nafatin iha 2020 para halo komparasaun.

“Iha porsentu 30 ne’e nia sa’e ka? Klaru nia sa’e, ha’u hanoin iha Ministériu Justisa sira iha polítika ida iha munisípiu hotu-hotu sira tenke fó rejistu sertifikadu ba labarik ne’e gratuita, infelizmente dalaruma iha suku ne’e maka iha obstákulu, maibé ita hein katak labarik sira bele rejistu, iha sertidaun RDTL no mós iha Ázia Pasífiku iha kompromisu ida katak 2024 ne’e ema hotu tenke rejistu”, hateten Elias dos Santos.

Ministra Finansa ein ezersísiu, Sara Lobo Brites, hateten, dezde Objetivu Dezenvolvimentu Miléniu (ODM) remata iha 2015, Timor-Leste kontribui maka’as ba definisaun ODS hodi advokasia no asegura inkluzaun ODS 16 kona-ba promove sosiedade ne’ebé pasifika no inkluziva ba dezenvolvimentu sustentavel, fasilita asesu ba justisa ba ema hotu-hotu.

Nu’udar estipula ona iha Planu Dezenvolvimentu Estratéjiku (PED) no programa tinan lima Governu nian, objetivu fundamentál ne’ebé Timor-Leste hakarak atinje mak iha dezenvolvimentu ne’ebé inkluzivu no sustentavel.

“Atu asegura inkluzividade no ekuidade, Governu mós fó prioridade ba dezenvolvimentu labarik idade ki’ik liu tinan lima no joven idade ki’ik liu tinan 18 ne’ebé reprezenta kuaze porsentu 12.7 no 46.4 totál populasaun, respetivamente”, tenik Vise Ministra Sara Lobo Brites .

Inkluzividade no ekuidade ne’ebé Governu promove daudaun mak kria oportunidade ne’ebé hanesan ba labarik no joven sira hodi prepara sira atu asegura futuru Timor-Leste ne’ebé dame, prósperu no respeitadu iha nivel rejionál no mundiál.

Relatóriu ne’ebé lansa ne’e, Vise Ministra Sara Lobo Brites hateten, importante tebes ba Governu no parseiru dezenvolvimentu tomak, tanba ida ne’e aprezenta informasaun ne’ebé komprensivu kona-ba dezenvolvimentu labarik iha Timor-Leste iha kontestu ODS nian.

Nia hatutan tan, ho relatóriu ne’e espesífikamente sei tulun atu identifika no hatene progresu, oportunidade, dezafiu sira ne’ebé asosiadu ho dezenvolvimentu labarik sira iha Timor-Leste. Dadus no evidénsia ne’e sei tulun atu dezeña no aliña polítika no programa, no koordenasaun serbisu ne’ebé di’ak liu hodi suporta no asegura labarik sira-nia direitu, no prepara sira hodi sai rikusoin ne’ebé asegura dezenvolvimentu sustentavel ba Timor-Leste.

“Ministériu Finansa komprometidu atu utiliza relatóriu ne’e iha prosesu preparasaun no definisaun polítika fiskál, liuliu ba Jornada Orsamentál ne’ebé sei halo iha fulan ida ne’e hodi prepara proposta Orsamentu Jerál Estadu ba tinan 2020”, tenik Sara Lobo Brites.

Lansamentu ba relatóriu ne’e hetan suporta hosi Governu Japaun, Reprezentativa Fundu Nasaun Unida ba Labarik sira (UNICEF-sigla inglés) no United Nations Population Fund (UNFPA).

Reprezentante UNICEF, Valérie Taton, dehan bainhira hakarak halo planu ne’ebé di’ak ba labarik maka tenke hatene situasaun ne’e mak oinsá. Ne’e mak tenke liuhosi dadus, bainhira hakarak sukat progresu ne’ebé halo.

“Tanba ne’e maka ami servisu hamutuk ho Diresaun Jerál Estatístika atu publika dokumentu rua ne’e. Nune’e bele fó figura boot ida hanesan situasaun husi labarik nian bazeia ba ODS no tuir dadus husi sensu 2015 ne’e no aban-bainrua sensu foun halo fila-fali bele uza dadus ida ne’ebé iha tiha ona atu sukat no haree progresu ne’ebé halo”, tenik Valérie Taton.

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here