ONGV. Imajen espesiál

DILI, 9 maiu 2019 (TATOLI ) – Xefi Departamentu Banku Urjénsia Óspital Nasionál Guido Valadares (ONGV), Nilton da Silva, hateten Banku Urjénsia óspital fó atendementu ba pasiente bazeia ba kategoria kór mean, matak no kinur.

Kór mean katak urjentemente tenke hetan lalais tratamentu, kinur; labele hein liu minutu 30 no matak bele hein to’o oras haat no neen.

“Dala barak ita nia maluk sira la komprende lala’ok servisu iha óspital ne’e, iha ne’e pasiente mai ami bazeia ba kategoria tolu, primeiru se karik pasiente mai ho kór matak ou la’o de’it katak pasiente bele hein to’o oras haat to’o neen, mai ho klarifikasaun tama iha kór kinur hein labele liu minute 30, ikus liu maka pasiente mai ho kór mean ne’e katak urjentimentu ami fó tratamentu”, afirma Nilton da Silva ba jornalista sira iha ONGV, Bidau Toko Baru, ohin.

Nilton da Silva akresenta dala barak kór mean no kinur laiha problema, maibé kór matak maka sempre ema kestiona, tanba la pasiensia hein.

“Ha’u la’os dehan sira sala ou laloos, maibé mai ho moras kór matak, se bele ba lai sentru saúde, tanba espasu iha sala urjénsia mós la sufisiente atu akumula hotu inklui ami nia médiku limitadu, ne’ebé ami tenke atende uluk sira ne’ebé presiza duni atu atende hodi salva uluk lai sira nia vida, bainhira loos ona maka fó fali atendementu ba sira ho kór matak, kazu ne’e dala bara kami hasoru”, katak.

Ikus liu, Nilton apela ba komunidade ne’ebé halo tratamentu normál la presiza ba óspital nasionál, maibé bainhira sentru saúde haruka ona atu tratamentu iha ONGV maka tenke verifika didiak.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here