Ministru Negósius Estranjeirus no Kooperasaun Dionísio da Costa Babo kaer liman ho Vice Ministra Negosiu Estrainjeiru Norwegia Marianne Hagen iha MNEC, Tersa 7 Maiu 2019. Vice Ministra Marinne visita servisu iha Timor Leste durante loron rua hodi halo kooperasaun entre Timor Leste ho Norwegia Imajen/Antonio Goncalves

DILI, 07 maiu 2019 (TATOLI)- Vise-ministra Negósiu Estranjeiru Noruega, Mariana Hagen vizita Ministru Negósiu Estranjeiru no Kooperasaun, Dionísio Babo Soares  ho objetivu hodi ko’alia kona-ba relasaun serbisu hanesan atividade governu nian, liuliu Governu Noruega nian iha Ázia no mai Timor-Leste (TL).

Vizita traballu ne’e importante hodi haree serbisu ne’ebé maka governu Noruega halo hamutuk ho Worldfish liuhusi implementasaun Programa Nasaun Unida ba Dezenvolvimentu (UNDP-sigla inglés) iha Timor-Leste.

Ministru Negósiu Estranjeiru no Kooperasaun, Dionísio Babo Soares hateten katak Noruega apoiu orsamentu lubuk ida ba organizasaun Wordfish ne’ebé implementa husi UNDP hamutuk ho organizasaun seluk iha Timor-Leste, hodi foka liu ba serbisu sira hanesan iha parte tasi nian maka hanesan peska ilegál sira no oinsá atu hamoos fo’er husi tasi no hodi hatene mós dezafiu no situasaun tomak ne’ebé maka peskadór sira hasoru.

“Depois ami ko’alia mós kona-ba ligasaun ne’ebé Timor-Leste halo ona ho Governu Noruegés desde que antes I depois independénsia hanesan mós porezemplu sira-nia modelu jestaun ba fundu petróleu nian ne’ebé ita uza mós hanesan modelu ida. Nia mós husu sobre situasaun peskaria nian iha Timór, dezafiu saida mak ita hasoru inklui mós buka hatene koñesimentu oinsá mak ita jere ita-nia fundu petrolíferu no mós oinsá mak ita serbisu hamutuk ho kompañia sira oinsá mak atu bele dada pipeline mai iha ita-nia rain,” informa Ministru Dionísio Babo Soares iha Edifísiu MNEK, Praia dos Coqueiros-Dili, tersa (07/05).

Husi vizita ne’e Vise-Ministra ne’e mós sei hasoru entidade timoroan balun, liuliu sosiedade sivíl ne’ebé maka hetan ona apoiu fundu husi Noruega.

“Fundu ne’ebé hato’o husi fundasaun internasionál ba entidade timoroan sira governu laiha asesu tanba fundu sira ne’e entrega liu husi organizasaun internasionál no organizasaun sira ne’e rasik maka halo implementasaun ho parseiru lokál sira,” dehan governante ne’e.

Nune’e, tuir Ministru Negósiu Estranjeiru no Kooperasaun ne’e, Governu Noruega rasik seidauk iha relatóriu kona- ba kestaun ne’e, tanba ne’e sira-nia prezensa atu haree diretamente hodi bele partila ho Timor-Leste.

“Hau hanoin ida ne’e importante tebes atu sira partilla sira-nia relatóriu ho governu atu governu mós bele akompaña sira-nia apoiu ba ita-nia sosiedade sivíl sira, atu nune’e bele iha nafatin koordenasaun serbisu ne’ebé di’ak,” dehan Ministru Dionísio Babo Soares.

Hafoin enkontru ho Ministru Negósiu Estranjeiru no Kooperasaun,  Vise-Ministra Noruega ne’e mós sei halo enkontru kortezia ho Prezidente Repúblika Timor-Leste, Francisco Guterres, Lú-Olo, nune’e mós Ministru Agrikultura hodi ko’alia kona-ba serbisu ne’ebé iha relasaun ho pekuária nian atu bele prevene tasi husi fo’er ne’ebé maka bele estraga ambiente. Vizita ne’ebé maka hala’o husi Vise-Ministra Noruega ne’e, durante loron rua iha Timor-Leste.

Jornalista       :Nelia Rosário

Editór             : Rafy Belo

HAKEREK NO HATÁN

Please enter your comment!
Please enter your name here