Renato da Costa

OPINIAUN, 08 maiu 2019 (TATOLI)—Kada sidadaun iha direitu atu hatene ho di’ak kona ba polítika no atividades governu nian. Tanba iha sistema demokrasia ne’ebé mak funsiona ho di’ak, governu fornese informasoens konfiáveis ne’ebé oportunas tebes ba nia públiku. Komunikasaoens ne’ebé efikásia entre governu no públiku importante tebes iha faze konsolidasaun pensamentu kona-ba politika Governu nian iha prosesu dezenvolvimentu liuhosi funsionamentu makina estadu nian.

Ho nune’e sidadaun ne’ebé dúvidas kona ba papél ninia governantes sira ho sistema administrasaun públika, hetan duni esplikasaun razoavel hodi hadook an hosi palavra interpretasaun polítika no mós rumoris ou propaganda tanba deit informasaun hirak ne’e. Papel ida ne’e importante tebes atu asumi hosi ofisiais komunikasaun governu nian iha kada linha ministeriais hotu.

Iha parte seluk, wainhira demokrasia bele funsiona ho efikaz, komunikasaun ne’ebé hamosu konfiansa ba nia sidadaun sai pilares importante iha prosesu ne’e tomak. Ho nune’e wainhira ita koalia kona-ba pratika BOA GOVERNASAUN, parte ida mak kada sidadaun iha direitu atu hatene saida mak kada instituisaun estadu ho ninia organismos seluk halo.

Informasoens ne’ebé mak fornese hosi governu tenke kredível no oportuna. Pontus prinsipais hosi hanoin hirak ne’e sai papel ne’ebé mais importante hosi ofisiais komunikasaun governu nian iha ninia planu servisu. Laos atu halo teatru deit hanesan fali sai journalista ne’ebé to ikus mai taka opurtunidade ba maluk journalista sira hodi halo nia kobertura tomak ou mais pior liu fali sai ofisiais komunikasaun governu maibe lahatene ninia papel.

Rekunhese mos katak komunikasaun Governu nian, reprezenta funsaun ne’ebé importante hodi hasae prinsipiu Boa Governasaun ne’ebé refere ba iha : efikásia (harii lejitimidade ba programa), kapasidade resposta (hatene nesesidade sidadaun nian no oinsa atu fo resposta), prestasaun de kontas (eiplika Governu ninia sistema administrasaun hodi fornese nia mekanismu hodi asegura Governu nia responsábilidade).

Esperensia balun ne’ebé ita hakat liutiha ona, hatudu katak wainhira laiha kultura konsultasaun no partisipasaun hosi ninia populasaun ba planu ne’ebé mak Governu atu halao sempre rezulta falta informasoens ne’ebé adekuadu ba ninia povu ne’ebé to ikus mai mosu opiniaun hosi públiku ne’ebé la koresponde ho situasaun real ne’ebé mak Governu infrenta hela. Mais pior liu tan, wainhira ofisiais komunikasaun instituisaun ne’e rasik lakon opurtunidade hodi hatene ho di’ak kuntiudu hosi planu ne’ebé mak iha hodi hato’o ba públiku.

Tamba partisipasaun ninia sidadaun nudar chave indikador komunikasaun ne’ebé efikas hodi asegura boa governasaun liuhosi kanalizasaun informasaun ne’ebé mak hato’o ba públiku. Portantu, ofisiais komunikasaun Governu nian laos dezenvolve deit komunikasaun ne’ebé efikas ,maibe involve mos ba prestasaun servisus ne’ebé orientadus ba ninia sidadaun. Katak asumi papel hodi ajuda fornese Governu nia hanoin kona ba servisu ne’ebé mak halao tiha ona, liu liu atu kria mekanismu transferensia informasaun ba públiku.

Hare ba konjutura politika kona-ba sirkulasaun informasaun hosi parte Governu ba públiku ne’ebé mak seidauk masimu no mos atu hatan ba iha sistema reforma burokrátika, papel ofisiais komunikasaun governu mais importante no estratégikas tebes. Nu’udar ofisias komunikasaun governu nian, ofisiais refere tenke proteje polítika instituisan ho prestasaun servisu ne’ebé mak iha hodi fornese mensajens no informasoens ba públiku ho klaru kona ba polítikas governu nian ho nia programa ne’ebé mak iha. Lisaun hosi países dezenvolvidu balun hatudu katak komunikasaun ne’ebé efetivu no efikas iha instiuisaun Governu nudar maneiras promosaun ba boas prátikas ne’ebé sempre iha ligadu kona ba questõens transparênsia.

Tanba wainhira ita aborda Governu nia insentivus hodi kompartilha informasoens ( interna no externa) kona ba saida mak Governu nia hakarak ba planu ne’ebé mak iha ho nia benefísios liuhosi dalan propriu de utilizasaun kanais komunikasaun ho efetivus, Governu hatudu ona ba públiku kona-ba aplikasaun politika OPEN GOVERNMENT. Ho nune’e, fatores determinantes hodi hametin instiuisaun governu iha prosesu kanalizasaun informasaun ba públiku ho efikas no efesienti maka reforsa servisu komunikasaun iha kada instituisaun hodi bele asegura funsionamentu ho nia proseduramentu tomak ba servisu transformasaun informasaun ba públiku ho efikas no efisienti.

Hodi konsidera katak komunikasaun ne’ebé efikas, essensial tebes hodi hato’o informasaun Governu nia politika hosi servisu hirak ne’ebé mak atinji tiha ona ba públiku ho los no klaru. Tamba servisu komunikasaun asumi papel ne’ebé importante hodi ajuda Governu nia politika ho nia benefísiu ba públiku hodi hatene saida mak Governu nia hakarak no mos hodi hatene planu ba futuru servisu ne’ebé planeada tiha ona. Tamba dever fundamentu hosi ofisiais komunikasaun instituisaun governu nian maka garanti nia efesiensia kona ba imajem instituisaun nian hodi asegura manten informasaun ne’ebé mak atu anunsia sai tenke, klaru, ezata , kompleta, konfiável , profissional, efikas no efisiente. Realidade iha terenu hatudu katak falta de profissionalismu komunikasaun iha instituisaun governu nian sai obstaklu sériu ne’ebé instituisaun governu sira infrenta ohin loron. Impaktu hosi limitasoens profissionalismu komunikasaun iha instituisaun governu nian prejudika mos ba informasaun ne’ebé fo sai ba públiku hosi midia sira.

Hodi hadia’ak sistema ne’e no mos atu fortifika di’ak liu ofisiais komunikasaun instituisaun governu nian no mos hodi asegura katak ofisiais komunikasaun instituisaun governu nian laos deit atu hatene ou hasai informasaun ba públiku kona ba qualquer eventus ne’ebé mak iha maibe requere mos ideais ne’ebé sólida ho nia kompreensaun ba substânsia programa no mos polítika Governu nian, presiza ona atu estabelese sistema komunikasaun ne’ebé efikas no efetivu iha nivel instituisaun governu nian, hodi bele kapasita di’ak liu ofisiais komunikasaun instituisaun governu nian atu bele proteje instituisaun governu nian ho informasaun ne’ebé los no klaru.

Atu bele aslera politika kona-ba oinsa moderniza sistema komunikasaun iha nivel instituisaun estadu sira hodi bele lao ho forma efikas, efisiensia no ofisial hodi hatan ba iha politika reforma nian, regras no prosidementus institusional kona-ba aplikasaun servisu ne’e sai mos indikador wainhira ita koalia konaba reforma sistema atendimentu informasaun ba públiku. Diskusaun ba asuntu ne’e, requere tebes involvimentu ativus hosi entidades governantes sira hodi bele sai giaun ou padraun ba aplikasaun servisu hirak ne’e iha futuru wainhira ita hakarak kanaliza informasaun estadu nian ba públiku ho verdade no onestu. “ Ita labele izola ita nia an ba informasaun hirak ne’ebé ita konsidera ninia nain mak públiku”

HAKEREK NO HATÁN

Please enter your comment!
Please enter your name here