Vise Prezidente Parlamentu Nasionál, Maria Angelina Sarmento. Imajen/Egas Cristóvão

DILI, 08 maiu 2019 (TATOLI)-Relatóriu Komisaun Inkéritu Parlamentár (KIP) la konsege hetan aprovasaun (Nulu) iha Parlamentu Nasionál. Ho nune’e, governu tenke halo nia fiskalizasaun rasik atu bele halo pagamentu ba kompañia sira ne’ebé hala’o ona servisu tuir regra hirak ne’ebé iha.

“Governu tenke halo nia fiskalizasaun rasik ba implementasaun projetu hirak ne’ebé kompañia sira ezekuta iha terrenu atu bele halo ona pagamentu ba kompañia sira maske relatóriu KIP la aprova”, argumenta Vise Prezidente Parlamentu Nasionál, Maria Angelina Sarmento, hodi responde Ajénsia TATOLI, ohin, iha Parlamentu Nasionál (PN).

Deputada Maria Angelina Sarmento, hateten, governu kuandu halo nia fiskalizasaun maka deteta kompañia balun seidauk prienxe rekizitu legál, governu bele kontinua prosesa ba tinan oin no ba projetu sira ne’ebé konklui ona no prienxe regra, governu bele hahú ona halo pagamentu iha tinan ne’e.

Governu nia fiskalizasaun maka deteta kompañia balun involve iha aktu ne’ebé la loos karik, Deputada Maria Angelina Sarmento hateten, governu bele enkamiña ba Ministériu Públiku atu halo investigasaun.

“Ami halo ona audiénsia ho governu kona-ba projetu 43. Governu bele ezekuta ona nia kompeténsia, maibé kuandu iha projetu ruma ne’ebé realiza iha 2017 konsidera iha nosaun tendénsia ba korrupsaun ka violasaun ruma, presiza enkamiña ba ministériu relevante atu kontinua halo investigasaun profunda”, esplika Maria Angelina Sarmento.

Parlamentu Nasionál hakarak enkoraja governu atu haree progresu servisu hosi projetu hirak ne’e katak obra la’o di’ak, prienxe rekizitu, obra ho kualidade, signifika bele halo ona pagamentu ba kompañia sira.

“Ami mós halo ona observasaun katak kompañia sira iha duni kontratu servisu, sira konklui duni projetu ne’ebé ho kualidade di’ak tanba KIP halo duni entrevista ho komunidade sira katak projetu ne’e fó benefísiu ba komunidade, enkuantu projetu hirak ne’e maioria estrada no ponte”, nia hatutan.

Rezultadu relatóriu KIP tuir rejime jurídiku, dehan relatóriu tenke aprova iha nivel komisaun hafoin deklara sentidu votu ida-idak nian, maibé realidade hatudu katak relatóriu la konsege aprova, signifika la iha relatóriu finál.

Relatóriu KIP la aprova tanba iha membru KIP ladún konsidera opiniaun sira, entaun deputadu bankada AMP husu atu fó tan tempu ba deputadu sira hodi estuda relatóriu hodi reinteira didi’ak konteúdu antes hakat ba aprovasaun maibé meza nafatin insiste dehan relatóriu ne’e hakarak ka lakohi tenke aprova, finalmente bankada AMP la konkorda no membru KIP sira la prienxe kuorum atu halo aprovasaun ba relatóriu.

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here