Ministru Transporte no Komunikasaun (MTK), José Agostinho da Silva

DILI, 08 maiu 2019 (TATOLI)—Ministru Transporte no Komunikasaun, José Agostinho  da Silva, hateten prioridade Ministériu Transporte no Komunikasaun (MTK) nian ba tinan ida ne’e kontinua hatama reseita ba Estadu.

Iha Orsamentu Jerál Estadu (OJE) 2018, nia haktuir, ministériu refere hetan millaun $ 2.6, maibé konsege hatama fali reseita ba kofre Estadu.

“Realidade iha tinan 2018 liu-ba, Ministériu Transporte no Komunikasaun konsege hatama reseita ba kofre Estadu ho montante miliaun $11.1,”  nia dehan ba jornalista sira iha Palásiu Governu, kuarta (8/5/2019).

Reseita ne’e, nia esplika, mai hosi órgaun sira ne’ebé tutela ba Ministériu Transporte no Komunikasaun hanesan Administrasaun Portu Timor-Leste (APORTIL), Administrasaun Aeruportu no Navegasaun Aérea (ANATL, ep), Autoridade Aviasaun Sivíl Timor-Leste (AACTL-sigla portugés) no Autoridade Nasionál Komunikasaun (ANC-sigla portugés).

Atu aumenta tan reseita ba kofre Estadu, governante ne’e afirma, presiza halo enkuadramentu jurídiku no halo elaborasaun ba lei sira ne’ebé seidauk iha.

 “Sé laiha lei, bele konsidera ita halo kobransa ilegál. Entaun, foku ministériu nian mak enkuadramentu jurídiku,” nia katak.

Nia fó ezemplu, reseita aeruportu iha kanál hamutuk 22, maibé hahú hosi governu dahuluk to’o agora foin mak funsiona reseita tolu de’it. “Ha’u temi hanesan ne’e de’it. Lalika temi kanál sira ne’e nia naran,” nia informa.

“Kuandu lei ba reseita kanál sira iha ona, projesaun ba reseita doméstika ne’e sei sa’e liu-tan. Ami-nia projesaun ba tinan ida ne’e (2019), bele to’o miliaun $50, maibé tenke estabelese lei reseita nian,” Agostinho promete.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here