Kamera CCTV. Foto Google.

DILI, 08 maiu 2019 (TATOLI)–Komandu Polísia Munisípiu Dili halo ona koordenasaun ho Komandu Jerál Polísia Nasional Timor-Leste (PNTL) atu aumenta tan monta kamera Closed-circuit television (CCTV) iha kruzamentu estrada públiku kapitál Dili ne’ebé identifika risku ba asidente tráfiku.

Kamera sira ne’ebé monta ona iha  sidade Dili hamutuk 50 liu hanesan iha área Palásiu Prezidente Repúblika, Aitarak-Laran Dili, Delta, Kolmera, Rotunda Nicolau Lobato Comoro, Aeruportu Comoro, Bairru Pite, Kuluhun, Becora, Caicoli (Ministériu Justisa oin), Kristu Rei, Praia dos Coqueiras, Fatuhada no fatin seluk tan.

Kamera CCTV ne’e polísia monta sai matadalan ba polísia atu monitoriza movimentu sirkulasan transporte públiku durante oras 24.

“Ita-nia kamera CCTV ne’e ita monta iha de’it fatin kruzamentu sira ne’ebé ita haree risku ba isidente ruma, atu nune’e bainhira asidente ruma la konsege identifika kamera bele ajuda ita atu haree,” informa Komandante Interinu Polísia Munisípiu Dili, Superintendente Assistente Polísia, Euclides Belo ba jornalista sira iha Komandu PNTL Caicoli, Dili, kuarta (08/05).

Kona-ba kamera balun sira ne’ebé át ona, nia tenik, sira hato’o ona ba Komandu PNTL atu koordena ho governu para haree orsamentu atu sosa tan kamera.

Euclides rekoñese progresu hosi kamera CCTV durante ne’e ajuda tebes polísia Unidade Tránzitu hodi halo kontrolu asidente barak ne’ebé akontese.

Komandante ne’e fó izempu, dala barak labarik idade ki’ik sira sa’e motór la uza kapaseti no lori karreta viola ragra tránzitu no soke, polísia halo atuasaun haree tuir evidénsia iha gravasaun CCTV nian hodi foti prosesu tuir evidénsia.

Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here