Komandante Interinu Polísia Munisípiu Dili, Superintendente Assistente Polisia, Euclides Belo. Foto Eugénio Pereira

DILI, 08 maiu 2019 (TATOLI)—Komandu Polísia Nasionál Timor-Leste (PNTL) Munisípiu Dili, koloka ona membru hamutuk na’in 480 hodi halo seguransa iha Munisípiu Dili.

Polísia 400 ne’e asegura estabilidade iha postu administrativu neen hanesan Ataúro ho suku lima (5), Kristu Rei ho suku hitu (7), Don Aleixo ho suku lima (5), Metinaro ho suku rua (2), Nain Feto ho suku neen (6) no Vera Kruz ho suku hitu (7).

Polísia sira ne’e mai husi unidade Ofisial Polísia Suku (OPS) ne’ebé hetan apoiu husi Unidade Polísia Espesiál no Polísia Eskuadra Dili hodi serbisu ho autoridade suku sira garante siguransa husi loron to’o kalan.

“Ami garante nafatin seguransa iha Dili, tanba ita iha polísia 480 resin ne’ebé koloka iha Dili ho administrativu to’o suku no aldeia sira hotu,” informa Komandante Interinu Polísia Munisípiu Dili, Superintendente Assistente Polísia, Euclides Belo, ba jornalista sira iha edifísiu Komandu Munisípiu Dili, Caicoli, kuarta (08/05).

Euclides husu atu populasaun no líder polítiku sira labele pániku no trauma ho problema krime ki’ik sira ne’ebé akontes iha Dili tanba la afeta ba estabilidade nasionál.

“Ami garante insidente sira ne’ebé akontese la implika ba ita nia estabilidade nasionál, tanba ema sira ne’ebé komete krime ita kaptura no prosesa tuir lei,” nia garante.

Kona-ba komunidade Dili ta’uk la’o iha tempu kalan, Euclides husu ba povu no autoridade suku ho xefe juventude atu koopera ho polísia, katak, bainhira krime ruma akontese pasa lalais informasaun ba polísia para polísia bele halo atuasaun.

Polísia Dili fasilita mós populasaun atu hato’o keixa ba polísia bele kontatu ba númeru telefone fixu 3311380. Número telefone ne’e instala hodi fó asisténsia atendimentu emerjénsia ba públiku bainhira krime ruma akontese.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here