Vise-Ministru Saúde Bonifácio Maukoli dos Reis. Foto António Goncalves

DILI, 8 maiu 2019 (TATOLI) – Ministériu Saúde (MS) liuhosi ministru interinu, Bonifácio Maukoli dos Reis, hatete sei estabelese laboratóriu kualidade hodi halo teste ba aimoruk sira durante sosa husi liur.

“Sei haree polítika ida di’ak para hatama aimoruk mai ho kualidade, tanba ita seidauk iha laboratóriu ida hodi prova kualidade aimoruk ne’ebé hatama husi liur”, afirma Bonifácio Maucoli ba jornalista sira iha Palásiu Governu hafoin partisipa reuniaun Konsellu Ministru.

Governante ne’e mós promete, 2020 Governu bele halo planu di’ak hodi sosa medikamentu, nune’e garante kualidade no estoke sufisiente hodi fó atendementu ba komunidade.

Iha parte seluk, Ministru Saúde en ezersísiu ne’e mós preokupa ho númeru moras dengue ne’ebé mák sa’e maka’as.

Tanba ne’e, Ministériu Saúde nafatin sosializa ba komunidade hodi hamoos ambiente. Nune’e mós MS hasa’e kapasidade funsionáriu voluntáriu sira hodi halo promosaun ba família ida-idak.

Ho kestaun konfiansa, Bonifácio husu ba komunidade atu kontinua fó konfiansa ba pesoál saúde sira iha ospitál, sentru saúde no postu saúde sira.

“Labele sente tauk, tanba saúde ba ema hotu, mesmu akontese asidente balu, maibé pesoál saúde sira prontu nafatin oras 24 hodi fó atendementu, la haree ba kór, rasa no relijiaun sira”, akresenta Maukoli.

Governante ne’e mós apela nafatin ba pesoál saúde sira atu servisu ho amizade, fó tratamentu ho dignu ba komunidade, li-liu asegura étika.

Tuir dokumentu livru Orsamentu Jerál Estadu (OJE) 2019 iha livru 2, Planu Asaun Anuál, orsamentu MS ba tinan ne’e hamutuk milliaun $45,287 ne’ebé inklui ho saláriu no vensimentu.

Medida prinsipál ba tinan ne’e hosi MS mak asegura atendimentu ho kualidade ba kuidadu primáriu no sekundáriu ba populasaun hotu, kontinua fó formasaun ba profisionál saúde sira liuhosi kursu espesializadu, halo treinamentu ba médiku sira no ajente sira iha área saúde.

Seluk mak promove servisu onkolojia, katak espesialidade medisina ne’ebé ko’alia kona-ba neoplasis/tumor benigna (maus) no malignas  (fuik). Promosaun ne’e sei inklui; formasaun, edifísiu no ekipamentu.

Planu seluk mak dezenvolve servisu kardiolojia (siénsia medisina ne’ebé trata moras fuan) no pediatria (moras ba labarik sira).

Jornalista: Antónia Gusmão

Editora: Rita Almeida

Notisia ne’ebe relasiona: http://www.tatoli.tl/2019/05/sames-husu-ona-pesoal-saude-sira-la-uza-paracetamol-xarope/

HAKEREK NO HATÁN

Please enter your comment!
Please enter your name here