Ekipa Ministériu Interiór (MI) no Sekretáriu Estadu Protesaun Sivíl (SEPS), hahú aprezenta programa prioridade orsamentu jerál Estadu (OJE) 2020 ba Ministériu Finansa (MF) no Unidade Planeamentu Monitorizasaun no Avaliasaun (UPMA). Imajen Mídia Ministériu Interiór

DILI, 08 maiu 2019 (TATOLI)—Ekipa Ministériu Interiór (MI) no Sekretáriu Estadu Protesaun Sivil (SEPS) hahú aprezenta programa prioriidade orsamentu jerál Estadu (OJE) 2020 ba Ministériu Finansa (MF) no Unidade Planeamentu Monitorizasaun no Avaliasaun (UPMA).

Programa aprezentasaun ne’e, hato’o direta hosi Diretora Jerál Serbisu Korporativu, Guilhermina F.S. Ribeiro, Diretór Jerál Serbisu Migrasaun, Boavida Ribeiro no atual Diretór Jerál Serbisu Operasionál, Superientendente Asistente Polisia, Ismael Babo akompaña hosi Diretór Nasionál, Xefe Departamentu, Xefe Gabinete no asesór sira iha salaun enkontru edifísiu Ministériu Finansa, Aitarak-Laran, Dili, kuarta (08/05).

Tuir komunikadu imprensa ne’ebé Agência Tatoli asesu hosi Serbisu Relasaun Públika Ministériu Interiór iha kuarta ne’e haktuir, objetivu hosi aprezentasaun ne’e parte ida atu hatene polítika, estratéjia no prioridade ministériu nian hosi fatór internál no externál ba atinje meta anuál, médiu no longu prazu, atu hatene baze line nu’udar baze ba planeamentu, nu’udar informasaun hodi determina loloos pakote fiskál 2020 no hanesan informasaun ba proposta hodi defini prioridad ba OJE 2020.

Iha aprezentasaun ne’e, Diretora Jerál Serbisu Korporativu, Guilhermina aprezenta planu estratéjiku no programa prioridade MI nian, no atuál Diretór Jerál Serbisu Operasionál, Superientendente Asistente Polísia, Ismael Babo aprezenta planu estratéjiku no programa prioridade 2020 hosi SEPS nian.

Entretantu, iha aprezentasaun programa prioridade ba 2020 SEPS, kontinua tau importánsia ba governasaun di’ak no reforma institusionál, establesimentu sistema integradu ba jestaun dezastre, hadi’a servisu protesaun sivíl ba atendimentu públiku, fasilita no implementa sistema partisipasaun sosiedade prevensaun dezastre no konflitu.

Enkuantu, programa espesífiku SEPS nian primeiru mak haforsa jestaun risku dezastre (prevensaun, preparasaun, mitigasaun, resposta no rekoperasaun), segundu prevensaun konflitu, dezenvolvimentu institusionál no rekursu uman, terseiru profisionaliza serbisu operasaun hodi asegura patrimóniu públiku.

Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here