Labarik sira dansa tradisional ho lafatik. Imajen/Antonio Goncalves

DILI, 8 maiu 2019 (TATOLI)—Fulan maiu, fulan ne’ebé lori sorti di’ak ba Maria Vitória (Marvi). Nia hetan previléjiu rua tutuir malu. Aleinde hetan fiar sai hanesan promotora ba foinsa’e Timor-Leste, Marvi mós hetan oportunidade vizita rai Xina.

Marvi hakfodak ho konvite ne’e. Lori nia hanoin rua-rua. Konfuzaun. Tanbasá tenke hili nia. Maski nune’e, nia agradese.

“Ha’u mós lahatene tanba saida maka sira hili ha’u. Maibé, hosi ha’u-nia parte rasik agradese tebes tanba ema nafatin tau fiar mai ha’u lori Timor nia naran. La’ós ba tuir kompetisaun maibé lori Timor nia naran hatudu ita-nia kultura iha ne’ebá (Xina),” dehan Marvi liuhusi entrevista eskluzivu ba jornalista Tatoli iha nia rezidénsia Aitarak Laran, Dili, Tersa (8/9/2019).

Oportunidade ne’e, nia hetan hosi Embaixada Xina ba Timor-Leste liuhusi kooperasaun ho governu Timor-Leste. Advogada ba UNICEF dahuluk iha Timor-Leste no vensedora The Voice Portugal (2018) ne’e sei aprezenta Timor-Leste nia kultura iha Xina liuhusi múzika.

 Iha ne’ebá, Marvi haktuir, la’ós atu halo konsertu espesiál ba artista timoroan maibé konsertu ida ne’e halo ba nasaun 40. Hosi nasaun hirak ne’e, sei halibur sira-nia artista-múzika hamutuk ema 500.

Marvi hateten, aleinde konvida nia, Embaixada Xina mós konvida artista-múzika Gerson Oliveira. Sira sei aranka iha aban, kinta (9/5/2019), hamutuk ho sira-nia jestór/a no timoron sira seluk.

“Iha ne’ebá, ami-nia grupu na’in neen (6) ne’e sei lori múzika ida. Maibé, múzika ida ne’e, múzika tradisionál hosi Xina nian. Iha ne’ebá, ami sei hatais ita-nia hena tradisionál ‘tais’ ne’ebé beiala sira husik hela mai ita. Múzika ida ne’e, ami hotu-hotu kanta,” nia haklaken.

Tanba ne’e, Marvi husu nafatin ba timoroan sira-nia orasaun no suporta hodi nune’e sira bele to’o iha Xina no bele hatudu Timor-Leste nia kultura ba nasaun seluk ho susesu. Tuir planu, sira iha Xina durante semana ida resin no sei fila hikas mai Timor-Leste iha loron 17 maiu, semana oin mai.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here