Promotora ba froinsa'e Timor-Leste, Maria Vitória. Imajen António Gonçalves

DILI, 8 maiu 2019 (TATOLI)—Advogada Fundu Nasaun Unida ba Labarik (UNICEF-sigla inglés) iha Timor-Leste, sei hala’o nia misaun hodi halo advokasia no proteje labarik sira-nia direitu bazeia ba direitu labarik fundamentál sira hanesan asesu ba edukasaun, saúde, seguransa no asesu ba informasaun.

“Ba oin, ami seidauk iha planu. Maibé, kuandu sai ona advogada ba labarik sira katak ita proteje labarik sira. Buat ne’ebé maka ha’u tenke prepara ne’e maka oinsá ha’u bele haree labarik sira-nia saúde, situasaun, ambiente ne’ebé sira hela ba ne’e. Ida ne’e maka ha’u hakarak haree ba futuru,” hatete Advogada ba UNICEF dahuluk iha Timor-Leste, Maria Vitória da Costa Borges (Marvi), liuhusi entrevista eskluziva ba jornalista Tatoli iha nia rezidénsia Bairru Pité, Dili, kuarta (8/9/2019).

Nia hateten, iha mundu globalizasaun, labarik sira presiza liberdade atu halimar no liberdade atu inan-aman sira rona labarik sira. Tempu agora, labarik no joven sira presiza papél inan-aman atu haforsa sira-nia moris la’ós atu fó presaun tuir inan-aman nia hakarak.

Iha dezintendementu entre inan-aman no labarik sira, nia dehan, nia sei hala’o ninia misaun loloos atu fó motivasaun ida ne’ebé maka loos hodi labarik bele la’o tuir dalan ne’ebé sira hakarak. Se labarik sira la’o tuir dalan ne’ebé sira hakarak, ezatamente, sira sei hetan buat ne’ebé di’ak.

Aleinde halo advokasia liuhusi liafuan motivasaun sira, Marvi mós sei halo advokasia liuhusi múzika tanba múzika mós bele motiva no bele garante mós proteje labarik sira-nia direitu.

“Tanba labarik no joven sira hatene katak ha’u ne’e kantora ka kanta-na’in ida. Entaun husi ne’ebá, la’ós ko’alia de’it, la’ós fó motivasaun de’it, ha’u sei halo advokasia liuhusi múzika sira ne’ebé ninia liafuan fó motivasaun ba labarik sira. Ezemplu, hanesan múzika We Are The Champion no múzika relevante seluk tan,” nia tenik.

Entretantu, atu hala’o nia misaun nu’udar advogada UNICEF iha Timor-Leste, nia kansela tiha planu atu hatutan nia estudu iha Portugal. Tanba, nia informa, oportunidade ne’e mai dala ida de’it no iha mundu edukasaun la koñese idade—ferik-katuas mós sei bele ba eskola.

Iha biban ne’e, ba foinsa’e no labarik sira iha Timor-Leste, Marvi apela atu esforsu-án nafatin no estuda maka’as tanba liuhusi dalan ne’e maka ema bele hetan susesu.

“Hanesan primeiravez sai advogada ba ita-nia nasaun Timor-Leste ida ne’e, ha’u laiha liafuan barak. Maibé, iha liafuan simples oan ida. Kuandu ita esforsu-án, liu-liu ba labarik no joven sira, bainhira ó esforsu-án ho ó-nia fuan serteja serteja ó sei hetan dalan ne’ebé maka di’ak. No, tenke estuda maka’as, reza maka’as tanba reza maka xave ba buat hotu. Ha’u bele hanesan ne’e ona maibé kuandu haluha reza ka ita la reza, entaun buat hotu hanesan ita halo maibé laiha valór,” nia apela.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here