Ministru Negósiu Estranjeirus no Kooperasaun Dionísio da Costa Babo Soares. Imajen: António Gonçalves

DILI, 07 Maiu 2019 (TATOLI)-Ministériu Negósiu Estranjeiru no Kooperasaun (MNEK) iha ona lista nomeasaun embaixadór foun hodi reprezenta estadu iha rai li’ur no aprezenta ona ba Konsellu-Ministru (KM) no hetan ona aprovasaun. Maske nune’e, lista naran sira ne’e sei “segredu” ka seidauk bele fó sai tanba seidauk hetan kompeténsia husi Prezidente Repúblika (PR) tuir konstituisaun.

“Ministériu Negósiu Estranjeiru iha ona lista nomeasaun ba embaixadór foun no lista refere aprezenta ona ba iha governu ho naran lubun ida no hetan aprovasaun ona husi Konsellu Ministru, nune’e sei aprezenta mós ba Prezidente Repúblika tuir konstituisaun, kompeténsia husi Prezidente Repúblika,” informa Ministru Dionísio Babo Soares ba TATOLI, iha edifísiu MNEK, Praia dos Coqueiros-Díli, tersa (07/05).

Governante ne’e akresenta, ho razaun ida ne’e MNEK sei hein rezultadu husi lista naran refere. “Nomeasaun Polítika ba Diplomata foun sira mai husi Ministériu Negósiu Estranjeiru no Kooperasaun bazeia ba lei bázika ne’ebé maka iha, liu husi mós husi indikasaun maka hanesan pratika ne’ebé halo durante ne’e, hodi bele halo indikasaun liu husi Ministériu rasik”.

Hodi hatutan: “Ida seluk husi indikasaun polítika, tanba ne’e diplomata ne’ebé funsionáriu públiku MNEK ramata mandatu fila mai Timór sei servisu iha MNEK, maibé diplomata ne’ebé indikadu politikamente dezempeña hotu, sei fila ba vida normál”.

Diplomata timoroan ne’e informa, kritéria bázika ba nomeasaun ba embaixadór sira hodi reprezenta estadu iha rai li’ur haree liubá esperiénsia serbisu, koñese vizaun polítika Timor-Leste nian, iha integridade pesoál, tenke timoroan ne’ebé hetan fiar husi estadu no iha responsabilidade atu aprezenta Timór liuliu koñesimentu luan kona-ba objetivu estadu, objetivu polítika estadu no nasaun nian.

Nune’e mós, polítika governu nian kona-ba saida mak bele alkansa iha rai li’ur no halo negósiu ho nasaun seluk hodi bele fó vantajen hodi proteje interese nasionál.

Ministru Dionísio Babo Soares mós esplika katak diplomata ne’ebé nomeia ba rai li’ur iha iha oin rua; embaixadór no ida seluk maka tékniku profisionál ka administrativu sira.

Nomeiasaun diplomata sei hili bazea mós ba nesesidade husi embaixada no mós bazeia ba nasaun ne’ebé embaixada Timor-Leste koloka ba. Instrusaun ne’ebé mai husi nasaun sira, MNEK sei halo tuir.

Ezemplu nasaun ida presiza nomeasaun diplomata na’in lima, nune’e Timor-Leste liu husi MNEK tenke haruka ema másimu lima ka menus husi lima.

“Normalmente diplomata sira ne’e rasik sei hetan nomeiasaun hodi ba hela iha rai li’ur másimu tinan tolu.  Governu bele halo estensaun ba sira-nia mandatu kompletu ka ba tinan balun de’it tuir servisu konsulta nesesidade ministériu nian ne’ebé prienxe,” haktuir Ministru Dionísio Babo soares.

La Taka Embaixada

Iha biban hanesan, Ministru Negósiu Estranjeiru no Kooperasaun, Dionísio Babo Soares klarifika mós kona-ba informasaun ne’ebé espalla katak sei taka embaixada Timor-Leste iha nasaun balun.

“Embaixada la taka maibé embaixadór maka não residente, signifika embaixadór iha Embaixada Maputo, Mozambique maibé embaixada ne’e reprezenta nafatin podér hanesan embaixadór ba Angola no Áfrika Sul,” klarifika ministru.

Governante ne’e klarifika liután katak uluk ita iha embaixada rua iha fatin rua ne’ebá, maibé ita iha polítika ida atu deside katak iha parte sul, ita la presiza embaixada iha rai tolu ne’e hotu, tanba ne’e ita deside atu suspende ka hasai tiha.

“Nune’e Embaixadór iha Mozambique maka sei reprezenta fatin rua ne’e.  Hanesan mós nasaun balun iha mundu. Inklui, Angola ne’ebé maka embaixada ida de’it iha Singapore maibé kobre hotu nasaun seluk bainhira iha servisu ruma maka vizita hodi halo negosiasaun para halo servisu hamutuk,” konklui Ministru Dionísio Babo Soares.

Lee mós notísia: http://www.tatoli.tl/2019/04/mnek-aprezenta-lista-embaixador-foun-ba-primeiru-ministru/

Jornalista       : Nelia do Rosário

Editór             : Rafy Belo

HAKEREK NO HATÁN

Please enter your comment!
Please enter your name here