Ministru Negósiu Estranjeiru no Kooperasaun (MNEK), Dionísio Babo Soares

DILI, 08 maiu 2019 (TATOLI)-Rezultadu enkontru Steering Committee ne’ebé mak organiza husi Ministériu Negósiu Estranjeiru no Kooperasaun (MNEK) liuhusi Servisu Ordenadór Nasionál (NAO) kona-ba progresu implementasaun projetu Jestaun Finansa Públika no PMFO (Jestaun Finansa Públika no Supervizaun-sigla inglés) ne’ebé mak finansia ho fundu Uniaun Europeia konklui katak iha serbisu lubuk mak kompleta maibé balun seidauk tanba situasaun polítika rai laran.

Ministru Negósiu Estranjeiru no Kooperasaun, Dionísio Babo Soares informa katak fundu Europeia ne’ebé fó diretamente ba Governu Timór no Jere husi Ministériu Finansa ne’e hodi jere programa jestaun hadi’a sistema finansiamentu no kapasitasaun no ba Instituto Camões, Portugal  hodi jere ba servisu ne’ebé relasiona ho língua, legál no justisa no mós projetu kona-ba desentralizasaun.

“Rezultadu aprezentasaun ba projetu husi komponente rua ne’e katak serbisu lubun ida maka kompleta tiha ona no serbisu lubun balun maka seidauk ho razaun tanba situasaun polítika rai laran ne’ebé maka akontese,” informa Ministru, Dionísio Babo ba TATOLI, iha Palásiu Governu, kuarta (08/05).

Tuir ministru katak impaktu husi serbisu lubun ida ne’ebé seidauk kompleta ne’e tanba husi Ministériu Finansa apár ho duodésimu no razaun labele ezekuta hotu kedas iha altura ne’ebá tanba tenke hasai osan kada fulan no tenke iha relatóriu.

Nune’e mós, husi Insituto Camões Portugal nian katak sira mós iha reestruturasaun iha organizasaun nia laran no mós seguransa, polítika, iha Timor-Leste ne’ebé maka sai mós hanesan baze ne’ebé impede serbisu balun ne’ebé seidauk kompleta. Tanba ne’e, husi komponente rua ne’e foin hahú hala’o fali serbisu sira ne’ebé seidauk kompleta.

“Projetu sira ne’e falta tinan ida tan hodi halo hotu ka kompleta. Se tinan ida ne’e labele ramata projetu sira ne’e, sei aumenta tan tinan ida maibé orsamentu ka fundu sei la aumenta no ida ne’e seidauk deside no tenke deside fali hosi komité tinan oin mai,” dehan governante ne’e.

Lidera Diálogu

Ministru Dionísio Babo Soares informa mós katak MNEK sei organiza no lidera diálogu polítika entre Timor-Leste no doadór sira ne’ebé apoiu Fundu Europeia ba Timor-Leste, iha loron 20 maiu 2019 ne’e, atu bele haree desizaun oinsá para bele define saida maka prioridade husi Timór nian.

Nune’e mós, Europeu entrega fundu mai Timor-Leste iha ámbitu programa saida; ida ne’e Timor-Leste maka tenke deside programa sira ne’e.

“Husi ne’ebá Ministériu Negósiu Estranjeiru sei bolu Ministériu seluk atu partisipa hodi hato’o mós idea ba doadór sira hodi bele konkorda hamutuk no koordena nafatin atu nune’e labele sai fali hanesan tinan uluk ne’ebé fundu entrega mai de’it maibé ita lahatene ita atu halo saida, nune’e ita tenke tuur hamutuk hodi diskute,” hateten Ministru Dionísio Babo.

Lee mós notísia: http://www.tatoli.tl/2019/05/mnek-avalia-progresu-implementasaun-projetu-finansa-publika-no-pfmo/?fbclid=IwAR1dJnl_lQWu_ELThfRPERWyfd4nOzXQNqXDekPvuXvekKpQvtZZYoat5eI

Jornalista       : Nelia do Rosário

Editór             : Rafy Belo

HAKEREK NO HATÁN

Please enter your comment!
Please enter your name here