Ministru Transporte no Komunikasaun, José Agostinho da Silva. Imajen/ António Gonçalves

DILI, 08 maiu 2019 (TATOLI)—Governu liuhusi Ministériu Transporte no Komunikasaun, sei dezenvolve setór tolu (3) hanesan transporte marítima, aéreu no transporte terrestre.

“Iha tinan 2020, Ministériu Transporte no Komunikasaun foka liu-ba dezenvolvimentu infraestrutura, transporte marítima, transporte aéreu, transporte terrestre,” Ministru Transporte no Komunikasaun, José Agustinho da Silva, ko’alia ba jornalista sira iha Palásiu Governu, kuarta (8/5/2019).

Governante ne’e dehan, planu ne’e inklui sinalizasaun roduviária  ne’ebé di’ak hodi garante nesesidade iha rai ida ne’e.

Nia hatutan, ba área urbana, hadi’a medida ba jestaun tráfiku atu bele responde ba situasaun ne’ebé mosu, nune’e mós teknolojia tráfiku hanesan utilizasaun sistema inovadór ba transporte hanesan sinalizasaun moderna hodi halo monitorizasaun ba tráfegu.

“Hadi’a kondisaun ba konfortu no seguransa ba pasajeiru transporte públiku hodi aumenta kualidade no fasilita pasajeiru sira bele hetan transporte públiku ne’ebé komfortável, efisiente no mós seguru liu-tan,” Agostinho esplika.

Nia haklaken katak transporte marítima no dezenvolvimentu infraestrutura portuária, permite Timor-Leste importa sasán atu diversifika ekonomia nasionál.

“Investimentu ba sistema portuáriu nasaun-nian sei haree tuir projetu Portu Tibar nian. Sei hadi’a di’ak liu-tan efisiénsia operasionál, inklui mós dezenvolvimentu ka konstrusaun portu rejionál foun,” Agostinho esklarese.

Ikus liu, tuir nia, transporte aéreu sai nu’udar servisu-xave ida ba movimentu ema no sasán mai Timor-Leste no hosi Timor-Leste ba rai-li’ur.

“Ne’e papél importante atu bele aselera dezenvolvimentu indústria turístika, komérsiu no negósiu seluk,” nia subliña.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here