Ministru Transporte no Komunikasaun, José Agustinho da Silva. Imajen Mídia MTK

DILI, 08 maiu 2019 (TATOLI)—Ministru Transporte no Komunikasaun, José Agustinho da Silva, hateten akordu vou (sasemok) Timor-Leste (TL)-Malázia sei iha prosesu.

 “Foin lalais ha’u hala’o vizita kortézia ba Kuala Lumpur, Malázia, ninia objetivu mak oinsá ita asegura konesaun transporte aéreu hosi Timor-Leste ba Kuala Lumpur, hosi Timor-Leste ba Singapore. Prosesu sei la’o hela. Ne’e la’ós fásil tanba hosi nasaun ida ba nasaun seluk,” Governante ne’e ko’alia ba jornalista sira iha Palásiu Governu, kuarta (8/5/2019), relasiona ho foin lalais nia hasoru malu ho Ministru Transporte Malázia nian hodi ko’alia kona-ba konesaun ka ligasaun internasionál aéreu nian.

Nia dehan, nasaun ida-idak iha regra, entaun Timor-Leste mós tenke submete no kumpri prosedimentu legál ne’ebé mak vigora iha Malázia.

“Ministru Transporte Malázia iha vontade tomak atu apoia ita iha área transporte aéreu nian,” Agostinho esplika.

“Ita-nia espetativa oinsá mak tenke lalais, maibé ema-nia burokrasia la’o iha ne’ebá ita mós tenke kumpri. Hakru’uk ba ema-nia regra sira ne’e,” nia tenik.

Nia hatutan, Timor-Leste nia esperansa mak oinsá normaliza lalais movimentu transporte aéreu ne’e.

Objetivu seluk hosi akordu ne’e, tuir Agostinho, atu asegura transporte aéreu nian, katak antes aviaun ruma mai Timor-Leste tenke iha baze legál.

“Ita tenke asina akordu ruma ho naran Air Services Agreement (ASA), entaun nasaun rua ne’ebé ita halo konesaun ba, ita tenke asina,” nia salienta.

Enteratntu, vou silk Air Dili-Singapura ne’ebé halo operasaun hosi Air Timor hanesan úniku ramata nia kontratu iha loron 30 marsu 2019 no kontratu ne’e rasik la extende.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here