Prezidente Timor Gap Francisco Monteiro,Imajen/Antonio Goncalves

DILI, 06 maiu 2019 (TATOLI) – Reprezentante Ministériu Petróleu, Alfredo Pires no Prezidente Timor Gap, Francisco Monteiro hasoru malu ho Primeiru-Ministru, Taur Matan Ruak hodi informa kona-ba projetu fasilidade mariña, ne’ebé hola parte iha Greater Sunrise.

Prezidente Timor Gap, Francisco Monteiro informa katak tempu badak ekipa interministeriál no Timor Gap sei hahú prosesu identifikasaun.

“Ohin ha’u ho ekipa mai halo briefing espesífiku kona-ba prosesu atu identifika rai ne’ebé mak iha Beaço, nune’e iha tempu badak ekipa interministeriál tun hamutuk Timor Gap hodi halo prosesu identifikasaun no tinan oin bele avansa ba prosesu realokasaun no fó dalan ba konstrusaun projetu fasilidade mariña iha Beaço, nune’e mós ba planta Liquefied Natural Gas (LNG) rasik,” informa lider másimu Timor Gap nian, Francisco Monteiro ba jornalista sira iha Palásiu Governu, segunda (06/05).

Iha enkontru ne’e, Primeiru-Ministru nota ho konfiansa no mós fó nafatin korajen ba Timor Gap no ekipa hodi bele halo serbisu hirak ne’e ho di’ak.

Tuir Francisco, atu fasilita projetu fasilidade mariña, Timor Gap iha ona akordu komersiál ho   kompañia Xineza,China Civil Engineering Construction Corporation (CCECC).

“Empréstimu ne’e desizaun governu nian. Husi parte Timor Gap, ohin ami briefing ona ba Primeiru-Ministru katak iha parte komersiál nian, ami hili ona parseiru ida atu bele implementa dadauk ona projetu fasilidade mariña iha Beaço. Ida ne’e hanesan komponente ida husi komponente seluk ne’ebé mak iha,” dehan Prezidente Timor Gap.

Francisco akresenta, Timor Gap hanesan entidade estadu nian ne’ebé hetan fiar husi estadu liuhosi governu atu jere no ezekuta komersialmente projetu Greater Sunrise nian.

“Ami halo pasu ida ona, asegura komponente ida husi projetu Greater Sunrise nian mak hanesan fasilidade mariña,” tenik tan Prezidente Timor Gap.

Lee mós notísia: http://www.tatoli.tl/2019/05/timor-gap-iha-ona-parseiru-hodi-finansia-projetu-downstream/

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here