Arquivo e Museu da Resistência Timorense. Imajen espesiál

DILI, 06 maiu 2019 (TATOLI)Arquivo e Museu da Resistência Timorense (AMRT) loke ona espasu istóriku to’o iha munisípiu sira iha Timor-Leste hodi rehabilita abrigu 10 ne’ebé uluk funu-na’in sira subar ba. Objetivu prisnsipál hosi AMRT maka atu prezerva dokumentu istóriku kona-ba rezisténsia.

 “Prezervasaun ohin loron ita ko’alia kona-ba dokumentu no dadaun ne’e sei sentraliza iha Dili maibé ita ko’alia kona-ba espasu istóriku, ita tenke ba munisípiu. Agora abrigu 10 ita rehabilita ona. Iha fulan rua nia laran tan, ita sei hatán ba planu lansamentu abertura ba abrigu 10,” informa Diretór Ezekutivu no Prezidente AMRT, I.P, Hamar Antoninho Baptista Alves dehan liuhusi entrevista eskluzivu ho jornalista Tatoli iha nia kn’ar fatin, Dili, segunda (6/5/2019).

Prosesu lanasmentu abertura ba abrigu hirak ne’e, nia dehan, kada abrigu iha ninia istória rasik ne’ebé bele loke ba públiku atu asesu. Prinsipalmente ba estudante sira ne’ebé hela iha área rurál atu bele asesu no hatene sira-nia istória rasik.

Tuir planu, Hamar hatutan,  vizita internasionál sira ne’ebé hakarak ba vizita abrigu sira ne’e bele halo pedidiu vizita ba Muzeu Rezisténsia. Tanba iha ne’ebá, instala ona kondisaun mínimu ruma ne’ebé bele halo atendementu ho billete, ho giaun ne’ebé sei tau ema para atu halo giaun própria ba kada abrigu.

“Sira ne’ebé halo vizita grupu ka vizita organizadu, ne’e bele halo pedidu tanba sistema ida ita sei kria. Kuandu abrigu ne’e loke, ita sei instala sistema halo atendeimentu ba kualker proposta ne’ebé mai. Ne’e iha tabela ruma ba pedidu sira ne’e tanba inklui kareta, inklui akomodasaun, ita sukat ho distánsia ho konbustível,” nia dehan.

Hamar  haktuir, AMRT prezerva dokumunetu rezisténsia hahú hosi tinan 2002 iha nível territóriu tomak no estranjeiru ne’ebé prinsipalmente sentralizadu ba iha grupu solidariedade. Liuhusi ida ne’e, AMRT konsege rekolla dokumentu iha rai laran hodi uza fonte prinsipál maka responsável rejiaun hotu-hotu ho meiu rekolla ne’e la’os obrigatóriu maibé voluntariamente.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here