Mapa esplorasaun mina no gas iha Tasi Timor. Imajen espesiál

DILI, 07 maiu 2019 (TATOLI)—Xefe Bankada Partidu Kongresu Nasionál Rekonstrusaun Timor (CNRT-sigla portugés), Duarte Nunes, hateten Austrália atu selu ka la selu ba esplorasaun mina-matan iha pasadu, ne’e depende ba akordu.

“Agora selu ka la selu, buat ne’e tenke tama akordu ne’ebé sira halo entaun depois nasaun rua ne’e tenke ko’alia ba malu, la’ós tanba fronteira ita ba ezije malu, maibé sira (TL no Austrália) sei bele ko’alia ba malu. Karik sira (Austrália) sente dehan la’ós sira-nia direitu, hanoin sira bele selu,” Duarte ko’alia ba jornalista sira iha Parlamentu Nasionál, tersa (7/5).

Antes ne’e, Austrália halo ona esplorasaun ba posu ka mina-matan ba Buffalo, Elang Kakatua no Coralina.

“Fronteira asina ona no hein ratifikasaun. Parlamentu rai-rua mak tenke ratifika, hanesan Austrália mós ratifika no ita mós ratifika hafoin ita uza ba interese ida-idak nian,” nia dehan.

Tuir nia, lei balun hanesan impostu ho lei sira seluk iha ligasaun tenke hadi’a antes Parlamentu Timor-Leste nian halo ratifikasaun.

“Lei sira ne’e uluk ita uza ba fronteira hamutuk ho Austrália. Agora lei ne’e foun, entaun adapta ba situasaun foun ne’ebé iha, hanesan lei imposu nian ho lei sira seluk,” Duarte esplika.

Tuir akordu ne’ebé Timor-Leste ho Austrália asina iha Organizasaun Nasaun Unida (ONU), iha loron 6 marsu 2018, artigu 1, aliña G kona-ba definisaun, hateten  Kampu Laminaria no coralline” signifika kampu domina hosi laminaria no carollina ne’ebé iha momentu asinatura prezente tratadu nian, nia-án hetan parsialmente iha área sira lisensa produsaun AC/L5 e WA-18-L nian.

Nune’e mós alínea H, esplika kampu petrolífero Buffalo signifika, kampu domina ho Buffalo ne’ebé iha momentu asinatura prezente tratadu nian, nia-án hetan iha área hosi autorizasun peskiza WA-523-P nian.

Iha mós alínea I, hatete kampu petrolíferu hosi kitan” signifika, kampu ne’ebé iha momentu asinatura prezente tratadu nian, nia-án hetan sujeitu ba kontratu hosi produsaun JPDA 06-105 nia partilla.

Tuir akordu 6 marsu 2018, bainhira akordu fronteira marítima ratifika ona, governu Timor-Leste sei foka liu ba prosesu dezenvolvimentu Greater Sunrise (GS), maibé governu sei harii entidade regulatória sira, hanesan Autoridade Dezignada no Konsellu Supervizaun ida.

Autoridade Dezignada sei responsável ba regulasaun no jestaun diária sira atividade petrolífera sira-nian iha área Rejime Espesiál nian, hafoun lori naran Timor-Leste nian no Austrália nian, no lori fali ba Konsellu Supervizaun nian.

Konsellu supervizaun kompostu hosi ema  na’in-rua, ne’ebé nomea hosi Timor-Leste no Austrália. Reprezentante konsellu supervizaun labele iha kualkér interese finanseiru ka interese komersiál diretu seluk iha operasaun ba rejime espesial greater sunrise nian ne’ebé bele hamosu konflitu iha interese, ka kualkér komprensaun razoável ba konflitu iha interese, no representantes refere tenki hato’o ho detallu sira-nia interese pesoál relasiona ho sira-nia pozisaun iha konsellu supervizaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here