Ezemplu medikamentu paracetamol xarope. Imajen hosi google.

DILI, 7 maiu 2019 (TATOLI) – Servisu Autónomu Medikamentu no Ekipamentu  Médiku, Empreza Públika (SAMES, E.P), husu ona ba pesoál saúde sira iha ospitál, sentru saúde no postu sira iha territóriu tomak atu la uza ona paracetamol xarope, tanba mudansa iha kór.

“Loloos paracetamol ne’e kór-de-rosa, maibé iha botir balu nia muda kór ba coklat, kuandu ami nota iha mudansa, ami aviza kedas ba pesoál saúde iha munisípiu katak labele uza”, hateten Diretora Ezekutiva SAMES, E.P, Odete Freitas, ba TATOLI, I.P iha nia kna’ar fatin kampu Alor, ohin.

SAMES, E.P, Odete Freitas dehan deside dada-fila medikamentu ne’e, hahú iha munisípiu Bobonaru, no seluk maske seidauk halo teste laboratóriu.

Odete Freitas haktuir medikamentu ne’e mai hosi Índia, ho kondisaun kontentór la uza ár kondisionadu (AC-sigla inglés), no kontentór sira ne’e demora iha portu no arredores SAMES nian.

Relasiona ho asuntu ne’e, SAMES, E.P, nia afirma toma ona medida ba empreza ne’ebé hatama ai-moruk hodi hatama foun medikamentu ne’e ho kondisaun kontentór uza AC.

Ai-moruk ne’e sosa husi empreza ESCO husi Índia, iha 2018. Medikamentu ne’e, nia akresenta halo ona verifikasaun hosi komisaun RNI (Receive National and Inspection) ho kondisaun di’ak no dokumentu kompletu molok distribui.

Bainhira simu, nia afirma tan SAMES armazena ho temperatura di’ak, entre 8-25 Grau Celsius.

Nia mós realsa tan sei kria planu ne’ebé di’ak hodi sosa medikamentu sira, tanba daudaun ne’e SAMES hasoru difikuldade ba espasu hodi guarda.

Seluk mak liga ho Diresaun Nasionál Farmásia ne’ebé dalaruma halo pedidu, husu barak liu, akontese mós husu uitoan liu, no aat liu mak sosa tiha, la uza. Ida ne’e fó impaktu ba SAMES.

Odete Freitas garante tinan ne’e estoke medikamentu la hotu, katak sufisiente hodi distribui ba ospitál sira, sentru no postu saúde sira iha territóriu.

“Ami iha lista esensiál ne’ebé maka Ministériu Saúde uza, stock out ne’e porsentu 11 bazeia ba relatóriu trimestrál ne’ebé maka ami relata ba Unidade Planeamentu Monitorizasaun no Avaliasaun (UPMA)”, tenik tan.

Nia hatutan tan: “Ai-moruk báziku sira ne’ebé maka iha, ha’u hanoin porsentu 11 husi totál ai-moruk ne’ebé rejista disponivel sufisiente”.

Medikamentu báziku sira maka paracetamol tablet (musan), paracetamol xarope (been), amoxicillin been no musan, cloxacillin musan no been, antacida, soru, aminophylline, cotrimoxazol musan no been, no ai-moruk bázika seluk.

SAMES planu tinan-tinan sosa, maibé depende ba pedidu husi Diresaun Nasionál Farmásia.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here