Ministru Defeza no Ministru Interiór ein ezersísiu, Filomeno da Paixão de Jesus. Imajen/ \Egas Cristovão

DILI, 07 maiu 2019 (TATOLI)—Primeiru-Ministru (PM), Taur Matan Ruak, husu ba Ministru Defeza no Ministru Interiór, Filomeno da Paixão de Jesus prepara koloka FALINTIL-Forsa Defeza Timor-Leste (F-FDTL) atu ba hala’o seguransa iha Kosta Súl hodi garantia seguransa ba prosesu kontrusaun plataforma Portu Beaço-Viqueque.

Tuir planu, VIII Governu Konstutusional,  Kompañia Timor GAP-ep ho Empreza China Civil Engineering Construction Corporation  asina ona akordu ho valór serka rihun $943 atu halo konstrusaun ba Portu Beaço-Viqueque ba dezembarke materiál sira durante konstrusaun tantu gazoduto ne’ebé sei lori gás naturál hosi kampu petrolíferu Greater Sunrise nu’udar unidade ida ba prosesamentu Gás Natural Liquefeito (GNL).

 “Ami ko’alia kona-ba preokupasaun ba iha seguransa iha Kosta Súl  ne’ebé Primeiru-Ministru  fó orientasaun ba ha’u atu halo nusa mak hatama planu iha tinan oin,” dehan Filomeno ba jornalista iha Palásiu Governu, Dili, tersa (07/05/2019), hafoin hala’o enkontru ho Xefe Governu, Taur Matan Ruak.

Governante ne’e dehan, Estadu iha devér atu fó seguransa ba kualker kompañia internasionál sira ne’ebé sei implementa projetu Estadu nian.

Governu, nia tenik, sei halo planu hodi haree ba rekursu forsa no ekipamentu sira ne’ebé sei prepara hodi monta postu  seguransa permanente.

“Ita sei haree prosesu hotu-hotu hodi halo planu di’ak foin aprezenta fali ba Konsellu Ministru,” nia haklaken.

Iha enkontru nee, PM Taur no Ministru Filomeno deskuti mós kona-ba kna’ar ekipa forsa zero-nove (09) to’o zero-onze (011) ne’ebé halo serbisu durante tinan hitu ramata ona, tan ne’e presiza halo fali rekurutamentu tinan 2020 nian.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here