Sekretáriu Estadu Arte no Kultura, Teófilo Caldas, Sekretáriu Estadu Komunikasaun Sosiál, Merício Akara ho bainaka sira seluk lansa Múzika Rezisténsia iha Muzeu Rezisténsia, segunda (6/5/2019). Imajen Mídia SEKOMS

DILI, 06 maiu 2019 (TATOLI)—Governu liuhosi Sekretaria Estadu Arte no Kultura (SEAK), lansa múzika rezisténsia ho títulu “Múzika Rezisténsia”, iha salaun Muzeu Rezisténsia, segunda (6/5/2019).

Múzika rezisténsia ne’e selesionadu nu’udar primeiru lugár iha programa edisaun konkursu dokumentáriu CPLP ba datoluk.

Produtór hosi  múzika rezisténsia ne’e maka Nuno Morinelo no realizadora mak Francisca Maia, ho durasaun dokumentáriu minutu 52. Orsamentu ba manán na’in ho montante euru rihun 50 (mil €50).

Realizadora ba múzika refere, Francisca Maia, sente kontente tanba sai manán-na’in ba konkursu internasionál ne’e, maske lori tempu naruk prodúz DOCTV III ho títulu “Múzika Rezisténsia”.

“Liuhosi múzika motiva no forma ida ba ita-nia independénsia, entaun ha’u hili múzika rezisténsia ba kompete iha konskursu internasionál no too’ ikus mai sai vensedór ba DOCTV CPLP III,” katak nia.

Motivasaun ne’ebé halo Francisca Maia hili títulu ne’e, hafoin VI Governu Konstitusionál lideradu Primeiru Ministru, Rui Maria de Araújo, lansa múzika ‘Maubere Timor’.

Hosi ne’ebá, Realizadora Francisca Maia hahú buka dadus kona-ba rezisténsia nian no kompete iha konkursu internasionál nível CPLP nian.

Iha biban hanesan, Diretora Jerál Arte no Kultura, Cecília Maria Belo de Assis, hateten programa CPLP audiovizuál nu’udar programa ida hosi komunidade uza língua portugueza nian.

Diretora ne’e haktuir, partisipasaun Timor-Leste nian iha programa audiovizuál hahú kedas inísiu ba realizasaun programa iha tinan 2019 ne’ebé Timor-Leste lori dokumentáriu “Uma-lulik” no partisipa mós iha tinan 2015 iha konkorsu dokumentáriu CPLP II iha ne’ebé hosi Timor-Leste prodúz dokumentáriu ida ho títulu “Criança Roubada”.

 “Ho determinasaun no vontade di’ak timoroan sira-nian, hatudu Timor-Leste nia imajen ba mundu, liuliu ba povu hosi membru CPLP,” diretora ne’e subliña.

Iha parte seluk, Prezidente Administrasaun RTTL, ep, Francisco da Silva Gari, informa RTTL hanesan mídia públiku, tanba ne’e prontu fasilita timoroan ne’ebé hakarak dezenvolve kultura orijinál Timor nian.

Aleinde ne’e, Koordenadór Jerál ba Programa Audiovizuál CPLP II, III atuál Diretór Nasionál Promosaun Arte no Kultura, Carlos de Jesus Freitas, tenik lansamentu ne’e ba datoluk ona no nia hein katak timoroan sira seluk bele hola oportunidade atu bele partisipa konkursu sira hanesan ne’e.

Entretantu, realizadór no produtór ba dokumentáriu “Uma-lulik” iha konkorsu dahuluk nian mak Victor de Sousa ho João Gomes, hetan osan ho montante euru rihun 50, durasaun dokumentáriu menutu 50, iha tinan 2009.

Realizadora no produtora ba dokumentáriu ho títulu “Criança Roubada” iha konkursu ba daruak mak Beti Reis ho Lurdes Pires, durasaun minutu 50, hetan orsamentu ho montante euru rihun 50.

Partisipa iha lansamentu ne’e mak Sekretáriu Estadu Arte no Kultura, Teófilo Caldas, Sekretáriu Estadu Komunikasaun Sosiál, Merício Akara, Prezidente Administrasaun RTTL, ep, Francisco da Silva Gari no bainaka sira seluk.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here