Teófilo Caldas, Sekretáriu Estadu Arte no Kultura. Imajen Eugénio Pereira

DILI, 06 maiu 2019 (TATOLI)—Governu liuhosi Sekretaria Estadu Arte no Kultura (SEAK), prontu fó apoia ba grupu kulturál sira ne’ebé hakarak prodúz dokumentáriu no autór sira ne’ebé hakarak hakerek istória.

Sekretáriu Estadu Arte no Kultura, Teófilo Caldas, hateten apoia ne’e oinsá fornese produtu sira ne’e ba iha nasaun Komunidade Nasaun sira ko’alia Lian Portugés (CPLP-sigla portugés) inklui nasaun viziñu.

Nia tenik, SEAK mak atu promove no fó apoiu grupu indústria kultura sira inklui autór sira ne’ebé maka hakerek múzika no hakerek istória.

“Ita tenke kontinua promove sira, maibé tenke mai ho grupu. Labele mai ho individu. Kuandu mai ho grupu governu tenke apoia sira, fasilita orsamentu hodi sosa ekipamentu ruma no fasilita orsamentu sira ba partisipa eventu kulturál ruma iha nasaun viziñu no CPLP,” Teófilo Caldas ba jornalista sira iha Muzeu Rezisténsia, segunda (6/5), hafoin hala’o lansamentu ba dokumentáriu programa CPLP audiovizuál.

Nia salienta katak ba oin SEAK hakarak halo kooperasaun forte liu-tan ho Sekretaria Estadu Komunikasaun Sosiál, Rádiu no Televizaun Timor-Leste (RTTL, ep) no mídia sira seluk atu promove kultura Timor.

Governante ne’e rekoñese orsamentu 2019 hodi apoia ba grupu kulturál la máximu, maibé sei apoia ho kondisaun ne’ebé iha. Tanba ne’e, iha tinan 2020, sei tau orsamentu natón hodi fó apoia atividade kulturál sira.

“Múzika rezisténsia ne’e konsidera hanesan patrimóniu Estadu no depois filmazen sira ne’ebé liga ho rezisténsia konsidera hanesan patrimóniu Estadu. Ne’e katak ita tenke prezerva para labele lakon, nia kontinuidade ba ita-nia jerasaun sira iha aban bainrua. Nune’e, jerasaun sira ne’ebé la asiste direta  prosesu funu ne’e bele hatene katak uluk ne’e istória múzika iha funu la’o hanesan ne’e,” katak nia.

Iha fatin hanesan, Sekretáriu Estadu Komunikasaun Sosiál, Merício Akara, orgullu ho timoroan sira ne’ebé prodúz dokumentu kona-ba prosesu funu liuliu múzika rezisténsia.

Nia konsidera dokumentáriu ne’e pasu pozitivu ba prosesu dezenvolvimentu kultura liuliu múzika rezisténsia ka múzika orijinál Timor nian.

“Kualkér sidadaun ne’ebé mak hakarak prodúz dokumentáriu hodi promove ita-nia kultura, governu apoia. Ita mós hatudu katak timoroan bele hakerek mesak ita-nia istória,” dehan Sekretáriu Estadu Komunikasaun Sosiál.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here