Ministru Reforma Lejizlativa no Asuntu Parlamentár, Fidelis Leite Magalhães. Imajen/ Antonio Goncalves

DILI, 07 maiu 2019 (TATOLI) – Governu liuhosi Ministru Reforma Lejizlativa no Asuntu Parlamentár, Fidelis Leite Magalhães, husu ba organizasaun sosiedade sivíl atu garante kualidade intervensaun iha kualkér implementasaun servisu governu nian.

“Organizasaun sosiedade sivíl bele kontinua informa no mellora kualidade intervensaun atu labele lakon prestíjiu no konfiansa hosi públiku”, afirma Fidelis Magalhães iha nia intervensaun iha ámbitu asinatura akordu kooperasaun FONGTIL ho Instituto Camões I.P, kona-ba auditória sosiál ba supervizaun finansa públika, ohin, iha Embaixada Portugal iha Dili.

Ministru Fidelis Leite Magalhães  konsidera, sosiedade sivíl nia ezisténsia importante ba kualidade demokrasia no kualidade dinamizmu sosiedade sivíl iha sosiedade laran.

“Foin lalais, ha’u  iha Tailándia no ha’u hakfodak tanba sosiedade sivíl iha nasaun rejiaun presiza iha instrumentu rejionál atu bele espresa sira nia hanoin. Iha nasaun ida ne’ebé ha’u labele temi nia naran, sosiedade sivíl iha nasaun ne’e lahetan dalan atu hasoru nia membru governu. Ate, iha nasaun ne’e sosiedade sivíl tenke uza mekanizmu rejionál hanesan ONU UNESCAP para bele enkontru ho sira nia Vise Ministra”, tenik Fidelis Magalhães.

Nia hatutan, Timor-Leste iha relasaun di’ak ne’ebé diferentemente ho nasaun sira seluk. Iha nasaun balun,  sosiadade sivíl iha relasaun ne’ebé ladi’ak ho sira nia governu.

Ministru Fidelis lia tun dehan, iha Timor-Leste, iha parseria ne’ebé di’ak. Sosiedade sivíl iha espasu atu intervein, so que agora  sosiedade sivíl tenke hadi’a kualidade intervensaun.

“Governu apresia FONGTIL, Unidade Auditória Sosiál nia servisu atu apoiu governu hodi bele halo polítika di’ak liután”, hateten Ministru Fidelis Magalhães.

Jornalista        : Zezito Silva

Editór             : Francisco Simões

 

 

 

HAKEREK NO HATÁN

Please enter your comment!
Please enter your name here