Logotipo Instituto Camões I.P ho FONGTIL

DILI, 7 maiu 2019 (TATOLI) – Forum ONG Timor-Leste (FONGTIL) ho Instituto Camões I.P, ohin, iha Embaixada Portugal iha Timor-Leste, asina akordu kona-ba projetu ida oinsá atu halo auditoria sosiál ba supervizaun iha finansa públika iha Timor-Leste (PFMO-sigla portugés).

“Atividade semináriu ne’e atu selebra MoU ida entre FONGTIL ho Embaixada Portugal liuhosi Institutu Camões I.P, ne’ebé ko’alia kona-ba apoiu implementasaun audotória sosiál iha Timor-Leste”,  informa Diretór Ezekutivu FONGTIL, Daniel Santos ba Ajénsia TATOLI  hafoin  serimónia selebrasaun akordu ne’e.

Daniel esplika, auditória sosiál ne’e mosu tanba inisiativa mai hosi governu anteriór no governu atuál fó nafatin espasu ba sosiedade sivíl liuhosi harii Unidade Auditória Sosiál ne’ebé tutela iha Gabinete Primeiru Ministru.

Auditória sosiál hanesan konseitu ida oinsá maka atu promove partisipasaun komunidade, liuliu oinsá maka komunidade bele halo audotória no tau matan ba programa governu nian iha baze.

Importánsia ba auditória sosiál, Daniel hateten, NGO fasilita de’it komunidade atu hatene livru orsamentu hateten saida, halo iha suku ne’ebé no benefísiu direta ba komunidade ka la’e. Tanba ne’e, auditória sosiál hanesan instrumentu ida komunidade nian, liuhosi FONGTIL sai hanesan fasilitadór, oinsá maka hakbiit komunidade nia koñesimentu ba auditória sosiál.

Nia hateten, auditória sosiál sei bele la’o bainhira prosesu dezenvolventu la’o, liuhosi setór haat maka edukasaun, infraestrutura, agrikultura no saúde. Iha área haat ne’e governu fó espasu ba sosiedade sivíl atu halo auditória sosiál, auditória ne’e la’ós atu buka governu nia sala maibé atu buka no hetan informasaun relasiona ho komunidade nia hanoin ba dezenvolvimentu no hatutan ba governu atu hadi’a.

Nia esplika mós katak, auditória la’ós atu halo audit ba finanseiru, maibé buka hatene benefísiu hosi programa sira ba povu nia moris iha setór haat ne’ebé iha no akordu  ne’e bele implementa ona auditória sosiál to’o 2021 ba ministériu haat.

Maneira auditória sosiál, Daniel esplika, oinsá atu halo diskusaun ho komunidade, oinsá atu observa no oinsá halo survey maibé FONGTIL prefere liu uza maneira simples hanesan halo diskusaun ho komunidade atu hatene programa governu nian.

Programa auditória sosiál agora ba tinan haat ona, hahú hosi 2016, parseria ho Fundasaun Ázia  ne’ebé apoiu hosi Uniaun Europeia no  ezekuta ona iha munisípiu 12 exeptu Oe-cusse.

Iha serimónia asinatura akordu ne’e hetan prezensa mós hosi Ministru Reforma Lejizlativa no Asuntu Parlamentár, Fidelis Magalhães, Embaixadór Portugal iha Timor-Leste, Embaixadór União Europeia iha Timor-Leste no  mós Vise Prezidente Instituto Camões I.P.

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here