Prezidente Timor Gap Francisco Monteiro,Imajen/Antonio Goncalves

DILI, 06 maiu 2019 (TATOLI) – Prezidente Timor Gap, Francisco Monteiro informa katak Timor Gap iha ona prosesu negosiasaun ba implementasaun projetu pipeline no halo ona kálkulu ba kustu. Kálkulu ba pipeline ne’e, tuir estudu Timor Gap, maizumenus millaun $826.

“Pipeline nia iha prosesu negosiasaun nia laran, mas husi ita-nia estudu hatudu hela uluk ita halo kálkulu ba pipeline ne’e cerca de milhão $826, ne’e tuir ita nia estudu ne’ebé mak ita uza kompañia reputável internasionál hodi halo kálkulu ba ita no halo dezeñu enjeñeira,” informa Prezidente Timor Gap, Francisco Monteiro ba jornalista sira iha Palásiu Governu, segunda (06/05).

Nia hatutan: “Agora ami iha diskusaun no negosiasaun ho parseiru sira atu haree karik iha posibilidade bele diminui kustu ne’e liuhosi dalan oin-oin, mas ita pelumenus iha referénsia ona kona-ba plafon másimu ne’e hira, tamba ita iha referénsia liuhosi estudu ne’e rasik”.

Tuir autoridade másimu Timor Gap ne’e, kona-ba kustu ba pipeline ekipa Timor Gap halo ona esforsu hela atu bele mai husi Europa maibé seidauk to’o iha nia konkluzaun.

Nune’e mós nia akresenta, ba planta Liquefied Natural Gas (LNG), fábrika ne’e rasik iha ona kontaktu lubun ida, inklui ho Xina no mós ho Japaun.

Lee mós notísia: http://www.tatoli.tl/2019/05/timor-gap-sei-identifika-fatin-konstrusaun-fasilidade-marina-iha-beaco/?fbclid=IwAR2tisDcu7viP1H1F9RzVfd6EzUj0Z_F4Wk_WEOwg5FIrm36bmMldR7gLfs

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here