Avelino Maria Coelho da Silva

DILI, 07 maiu 2019 (TATOLI)–Eis membru Asembleia Konstituante, Avelino Maria Coelho da Silva, hateten autoridade lokál sira tenke iha koñesimentu kona-ba Estadu no oinsá Estadu organiza nia án.

“Ita hakarak autoridade lokál iha ukun tenki iha hanoin no koñesimentu ne’ebé kle’an kona-ba saida maka Estadu no oinsá mak estadu organiza nia án hakat ba dezenvolvimentu hodi haree ba edukasaun ne’ebé transforma ema sai responsável,” nia hateten liuhusi formasaun kona-ba edukasaun sidadania ne’ebé organiza hosi Institutu Defeza Nasionál (IDN) iha salaun Pateo, Kolmera, Dili, tersa (7/5/2019).

Nia esplika katak Estadu kompostu hosi órgaun sira hanesan Prezidénsia Repúblika, Parlamentu Nasionál, Governu no Tribunál.

Avelino informa, órgaun sira ne’e iha separasaun podér maibé sira nia kna’ar interligadu katak sira (órgaun hirak ne’e) sempre serbisu hamutuk atu bele atinje prosperidade povu no nasaun.

 Tuir nia katak autoridade lokál sira tenki hatene kle’an modelu demokrasia no polítika iha rai laran hodi sira dezenvolve sira nia án atu kontribui ba dezenvolvimentu Estadu.

Iha fatin hanesan, Diretór Institutu Defeza Nasionál  Timor-Leste (IDN-TL), Donaciano Gomes “Pedro Klamar Fuik” dehan, ho formasaun pensamentu seguransa no defeza nasionál ne’ebé IDN halo ba autoridade nasionál atu kontinua sai líder ida di’ak iha kapasidade rezolve problema iha idak-idak nia suku hodi hametin pás no estabilidade seguransa.

Durante ne’e, nia haktuir, IDN mós fó formasaun defeza no seguransa ba lideransa militár sira hosi F-FDTL no PNTL atu kapasita án sai líder ida di’ak iha futuru.

Nia afirma, ba futuru, sé de’it maka asumi kargu nu’udar líder nasionál tenki iha koñesimentu superiór, konvensionál, karaterístiku estratéjiku hosi nia hanoin, hosi ninia hahalok no oinsá mak nia halo atividade loro-loron ho maneira hanoin atu serbí interese sosiedade nian.

Pedro hatutan, karakterístiku líder nasionál seluk tan maka líder nasionál forma hanoin luan ne’ebé nakloke no karaterístika líder nasionál labele nonook, labele taka án, iha kazu ruma tenki nakloke  hatudu ba ema hotu-hotu hamutuk hetan solusaun.

Haree ba karaterístiku, tuir nia, líder nasionál ida tenki iha hahalok di’ak no koretu, firmi ho prinsípiu, iha valór umanu institusionál no morál nasionál, nune’e bele iha postura atu líder nasionál iha nasionalizmu boot tuir fundamentu ba filozofia no konstituisaun.

Aleinde ida ne’e, Pedro informa, líder nasionál tenki hatene estratéjiku nasionál iha rai laran no rai li’ur no iha kapasidade intelektuál hatudu iha prátika liga ba prosesu demokrasia hodi fó uluk interese nasionál ás liu interese partidu no interese pesoál.

Entretantu, Xefe Suku Manu Tasi, Postu Ainaro Vila, Munisípiu Ainaro,  Manuela da Silva Caldas  hato’o agradese ba IDN hodi fó formasaun ba sira no konsidera katak tema seguransa defeza nasionál nu’udar alvu importante ba sira oinsá maka fila ba idak-idak nia suku hodi kontinua garante pás iha povu nia leet.

“Ha’u hanoin formasaun ida ne’e di’ak tebes, tanba ami presiza aumenta rekursu no koñesimentu kle’an defeza no seguransa hodi implementa iha suku,” dehan Manuela.

Nia tenik, ko’alia kona-ba seguransa nu’udar aspetu importante ne’ebé sosiedade hotu- hotu hola parte atu hamutuk luta hamenus krime no violénsia sira hodi garante pás hodi kontribui ba dezenvolvimentu.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here