Jornalista veterano hosi Portugal, Adelino Gomes, halo enkontru ho KI iha sala plenaria KI, Quintal Boot, Dili, Segunda (6/5/2019). Imajen/Media KI

DILI, 7 maiu 2019 (TATOLI)-Jornalista veteranu hosi Portugal, Adelino Gomes, sente “onradu” no “orgullu” ho esforsu no desizaun Conselho de Imprensa Timor-Leste (KI-sigla tetun) ne’ebé hili nia naran ba prémiu KI nian iha kategoria reportajen jornalístika iha lian Portugés di’ak liu.

Adelino Gomes halo reportajen hosi Balibo, Bobonaro, iha tinan 1975. Imajen/Espesiál

“Onra boot mai ha’u tanba KI konsidera ha’u nia naran ba iha prémiu KI nian”,  hateten Adelino Gomes, bainhira halo enkontru ho Prezidente KI, Virgilio da Silva Guterres ho membru KI sira iha salaun Plenária KI, Quintal Boot, Dili, segunda (6/5/2019).

Jornalista veteranu  ne’e dezafia jornalista  timoroan sira atu bele kompete ba oportunidade prémiu ne’e no nia promete sei lori livru mai entrega ba KI kona-ba reportajen jornalístiku iha lian Portugés, atu bele sai referénsia ba jornalista timoroan hakerek iha lian Portugés.

Adelino Gomes, moris iha Marrazes, 10 agustu 1944, jornalista Portugés ida, ne’ebé halo kobertura iha Revolução dos Cravos, no nu’udar kolaboradór importante hosi jornalista Horst Hano, ARD durante tempu ne’ebé nia mosu iha Portugal iha tinan 1974-1976.

Adelino Gomes servisu nu’udar reporter RTP iha tinan 1975, periodu difisil liuhosi revolusaun ne’e, hodi kobre akontesimentu 11  marsu 1975, inísiu funu sivíl iha Angola no funu sivíl iha Timor.

Ba Timor -Leste nia prosesu luta, Adelino Gomes, halo kobertura ba situasaun difisil  Timor-Leste nian iha 1975 no konsege transmite entrevista ho Saudozu Nicolau Lobato iha Palásiu Governu antes invazaun Indonézia iha 7 dezembru 1975.

Ho nia obra jornalístika ne’ebé Adelino Gomes halo ba Timor-Leste nia prosesu luta nu’udar razaun forte ba KI  hodi deside no nomea Adelino Gomes nia naran ba kategoria prémiu obra jornalistiku iha lian Portugés di’ak liu.

Adelino Gomes nia prezensa iha Timor-Leste hodi responde ba konvite hosi KI atu sai oradór prinsipál iha Forum Diálogu Dili iha loron 9-10 maiu, tinan ne’e. Durante estadia iha Timor-Leste, Adelino Gomes mós hetan oportunidade hosi Embaixada Portugál iha Timor-Leste hodi sai oradór iha semináriu “Semana da Língua Portuguesa”.

Iha ámbitu Forum Diálogu Dili, iha loron 10 maiu 2018, Prezidente Repúblika, Taur Matan Ruak, atuál Primeiru-Ministru, halo lansamentu ba prémiu KI ho kategoria lima (5), kompostu hosi   Adelino Gomes, ba kategoria reportajen Jornalístika iha lian Portugés di’ak liu, prémiu  Francisco Borja da Costa, ba Kategoria Jornalista ne’ebé halo reportajen Jornalístiku ba asuntu interese umanu di’ak liu (mídia imprime ho online), prémiu Greg Shackleton ba Kategoria Jornalista ne’ebé halo reportajen Jornalístiku ba asuntu interese umanu di’ak liu (mídia eletrónika, rádiu no televizaun), prémiu Bernardino Guterres ba Kategoria Fotografia di’ak liu  ho prémiu KI ba kategoria mídia ne’ebé fó espasu barak liu ba notísia internál no tratamentu di’ak liu ba Jornalista nia moris di’ak (bem star).

KI nu’udar entidade reguladora órgaun komunikasaun sosiál iha Timor-Leste ho natureza hanesan entidade administrativa independente, hetan autonomia administrativa, finanseira no iha patrimóniu rasik, no define ho independénsia kona-ba orientasaun ba ninia atividade sira sein sujeita ba kualkér diretriz ka orientasaun hosi podér polítiku.

Jornalista: Francisco Simões

Editór: Xisto Freitas

HAKEREK NO HATÁN

Please enter your comment!
Please enter your name here