Jornalista Veteranu Hosi Portugal, Adelino Gomes. Imajen/Egas Cristovão

DILI,  7 maiu 2019 (TATOLI)-Jornalista senior no veteranu hosi Portugal  ne’ebé uluk halo reportajen iha Timor-Leste iha 1975, Adelino Gomes, fó konsellu ba jornalista timoroan atu kaer mandamentu rua ne’ebé importante mak, hanesan jornalista tenke hatene haree no tenke hatene halo no haree.

“Iha mandamentu rua, la’ós sanulu. Jornalista tenke hatene haree katak tenke komprende, jornalista labele halo notísia, labele halo reportajen, labele halo entrevista, halo krónika, no laiha jéneru jornalístiku se la komprende saida maka atu ko’alia, saida maka akontese”, hateten Adelino Gomes, iha ábitu selebrasaun Língua Portugeza no Kultura Komunidade ne’ebé ko’alia lian-portugés iha Embaixada Portugál, ohin, ne’ebé sai oradór iha atividade ne’e hodi ko’alia sobre jornalizmu iha tempu luta: relata iha portugés.

Adelino Gomes afirma, xave interpretasaun dahuluk maka presiza hatene haree. Jornalista iha obrigasaun, la natoon de’it nia hatene, nia tenke tranzmite ba ema seluk.

“Mandamentu daruak mak hatene halo no haree. Ita-boot sira husu depois bá monta iha rádiu, televizaun, jornál ne’ebé sei utiliza komputadór, enkuadramentu fotografia, ida ne’e hotu para tranzmite iha notísia. Pur tantu basta só hatene, haree ne’ebé persebe, no hatene, halo no haree, ne’ebé utiliza di’ak tékniku jornalístiku”, esplika Adelino Gomes.

Buat hirak hotu ne’ebé halo ne’e iha ona metade servisu jornalístiku, mas ezije servisu maka’as.

Reporter Rádiu no Televizaun Portugál (RTP) iha 1975 ne’e prezente iha Timor-Leste hodi relata sobre atividade jornalístiku ne’ebé nia halo iha momentu ne’ebá.

“Ha’u iha ne’e halo tentativa rápida hodi lori ba jornalista ohin loron, depois tinan 45 ha’u-nia testemuña ba pasajen ida breve, mas intensaun liu istória pedasuk ida Timór nian iha ha’u-nia kazu entre loron 8 outubru e 24 outubru 1975 mak loron ne’ebé ekipa reportajen mai iha ne’e atu tenta esplika ba ami-nia kompatriota portugés saida maka akontese iha Timór”.

La hatene di’ak saida maka akontese, laiha jornalista ida depois 25 abríl maka mai, tanba ne’e hakarak hatene funu sivíl maka hanesan ne’e, tanba sá timoroan hafahe, no relasaun saida ho Indonézia.

Aléinde Adelino Gomes, iha mós Max Stahl ne’ebé ko’alia sobre nia reportajen iha tempu okupasaun Indonézia nian.

Prezidente Konsellu Imprensa, Virgílio da Silva Guterres, hatete tanba ema sira ne’e hadomi sira-nia profisaun hodi mai to’o iha Timor-Leste hodi halo kobertura iha períodu rua ne’ebé la hanesan.

Adelino Gomes hahú nia kobertura iha Balibó 1975 to’o hotu no Max Stahl iha 1991 ne’ebé nia filmajen iha Santa Krús sai boot.

“Figura rua xave iha mundu jornalizmu nian, tanba ne’e sira-na’in rua sai oradór ne’e importánsia boot ba jornalista sira, liuliu estudante sira ne’ebé hakarak sai jornalista atu rona maizumenus difikuldade, dezafiu saida maka enfrenta iha ne’ebá, misaun saida, no tanba sá mak sira-nia rai dook sira hakarak sakrifika an atu mai Timór ne’ebé dook depois konflitu tan no arriska sira-nia vida”.

Tanba ne’e Prezidente KI hatete sé de’it maka estuda jornalizmu no ikus mai deside atu sai jornalista pelumenus hatene ona dezafiu saida maka sira sei hasoru iha futuru.

“Diferensa entre Adelino ho Max Stahl nian tanba Max Stahl mai iha tempu ne’ebé teknolojia ba komunikasaun nian sei todan, agora ita iha telefone sira ne’e hotu diferente”, hateten Virgílio Guterres.

Jornalista   : Maria Auxiliadora

Editór         :  Francisco Simões

HAKEREK NO HATÁN

Please enter your comment!
Please enter your name here