Imajen vítima Masakre Igreja Liquiçá, 6 abril 1999. Foto espesiál

LIQUIÇÁ, 06 maiu 2019 (TATOLI)—Eis líder rezisténsia, Kay Rala Xanana Gusmão, fó orientasaun ba autoridade kompetente sira iha Munisípiu Liquiçá atu harii monumentu ba Masakre 6 abríl iha Igreja Liquiça, tinan 1999.

Xanana Gusmão orienta asuntu ne’e bainhira nia partisipa iha selebrasaun Masakre Igreja Liquiçá nian iha abríl liu-ba no momentu ne’e Xanana dehan nesesáriu tebes harii momentu ba Masakre Igreja Liquiçá.

Tanba ne’e, ekipa komisaun organizadora hala’o dadaun ona reuniaun avaliasaun no rekolla pensamentu atu harii monumentu ba masakre refere.

“Ita-nia maun-boot Kay Rala Xanana Gusmão iha disponibilidade katak iha tempu besik monumentu lima harii iha Timor laran tomak inklui mós Liquiçá. Tanba ne’e  maka ita deskuti kestaun tékniku balun no espasu (fatin),” Administradór Munisípiu Liquiçá, Domingos dos Santos, ko’alia liuhusi reuniaun iha Koni, Munisípiu Liquiçá, domingu (5/5/2019).

Iha diskusaun ne’e mós ko’alia kona-ba ema ne’ebé atu halo dezeñu ba monumentu ne’e no presiza ko’alia mós ho igreja kona-ba fatin atu harii monumentu ne’e.

“Amu pároku ho Amu Bispu dehan fatin atu harii monumentu ne’e estratéjiku duni. Normalmente ita halo monumentu ida ema hotu tenke haree no fatin ne’ebé protokolu. Hanoin balun mai rebo-rebo maibé ha’u prefere tau iha sentru para públiku bele haree. Orsamentu sei deskuti,” nia tenik.

Iha diskusaun dahuluk ne’e, partisipa hosi veteranu, amu pároku, juventude, sasin no sobrevivente Masakre Liquiçá nian no sosiedade sivíl sira.

Liuhusi diskusaun refere, maioria husu atu garante kualidade ba monumentu to’o tinan 50, tanba ema na’in 29 mak mate iha masakre ne’e rasik.

Veteranu Vicente da Conçeição ‘Rai Los’, hateten presiza garante kualidade to’o tinan 50, tanba atu harii monumentu ida la’ós halo hanesan rate ida. “Ema halo dezeñu ne’e mínimu fulan-tolu, tenke presiza preparasaun ida ne’ebé natón,” nia katak.

 Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here