DILI, 06 maiu 2019 (TATOLI)—Timor-Leste (TL) partisipa eventu internasionál Arafura Games iha Darwin, Austrália, semana kotuk, konsege hetan medalla osan-mean lima (5) no osan-mutin tolu (3).
Modalidade ne’ebé partisipa iha eventu internasionál Arafura Games mak hanesan Tenis Kampu, Nani no Atletizmu.
Hosi modalidade hirak ne’e, Tenis Kampu iha atleta na’in-lima hanesan Inês Silveira, Idalina da Silva Lopez, Evaristo da Cosnçeição, Joaquim Ribeiro no Martinho Freitas. Hosi Modalidade Nani mak hanesan Francisco Ximenes Lopez no Hermenegildo Sani. Hosi parte atletizmu nian mak Teófilo Freitas.
Teófilo lori de’it medalla silver (osan-mutin) iha klase metru 1500 no osan mean iha metru 800, tanba iha Arafura Games, Komisaun Organizadora iha Austrália kria sistema ida ho naran multi-klase, entaun Teófilo kompete ho ema sira ne’ebé la’ós defisiénsia. Hosi parte Tenis Kampu nian, alteta sira oferese medalla osan-mean haat no osan mutin rua.
“Ita lori bandeira RDTL konsege lori medalla ualu (8). Osan-mean lima (5) no osan-mutin tolu (3). Maibé, ba espesífiku Paralímipiku ninian ita lori modalidade tolu hanesan Tenis Kampu, Atletizmu ho tan Nani,” Xefe Delegasaun Timor-Leste, Deolindo Henrique Pereira, ba jornalista sira iha Aeruportu Internasionál Nicolau Lobato, Comoro, Dili, segunda ne’e.
Deolindo haktuir, hosi parte Modalidade Nani nian la lori buat ida, maibé hatudu hatudu jogu di’ak no nia iha esperansa katak iha futuru atleta hosi modalidade refere sei oferese medalla ba Timor.
Entretantu, atleta Teófilo Freitas promete, durante nia sei forsa, nia sei defende nasaun RDTL liuhusi Modalidade Atletizmu.
“Ha’u-nia prioridade ba futuru mak eventu Olimpiade. Maske Arafura Games ha’u hetan tan medalla osan mean, maibé ha’u sei haka’as-án liu-tan hodi partisipa eventu boot liu Olimpiade nian iha tinan 2020,” nia dehan.
Antes ne’e, Teófilo partisipa eventu ida iha Malázia iha 2017 konsege lori osan mean 2, tinan 2018 iha Indonézia lori medalla osan mean 1 no 2019 rekolla osan mean ida ho osan mutin ida iha Austrália.
Iha biban hanesan, Prezidente Paralímpiku Nasionál Timor- Leste (CPNTL-sigla portugés), Isabel da Costa Ferreira, orgullu alteta sira ne’ebé partisipa iha eventu ne’e tanba balun konsege lori medalla osan mean no osan mutin.
“Ita orgullu tanba sira (atleta defisiente) partisipa iha kompetisaun Arafura Games konsege atinje misaun ho di’ak no hetan medalla. Ida ne’e bele inspira mós ita sira normál katak bainhira ita halo esforsu ba buat ne’ebé ita hakarak, ita konsege duni. Tanba ne’e, ita hanesan timoroan, fó parabéns ba atleta sira, liuliu ba Teófilo,” nia katak.
Eis Primeira-Dama Timor-Leste ne’e konsidera katak Timor-Leste mós bele, tanba partisipa eventu internasionál konsege lori medalla ba Timor-Leste.
Nia promete katak nia sei esforsa án hodi hadi’a kondisaun iha CPNTL nune’e ba futuru atleta sira mantein prestíjiu ne’ebé iha ona.
Jornalista: Evaristo Soares Martins
Editór: Xisto Freitas
