Sekretáriu Estadu Komunikasaun Sosiál (SEKOMS), Merício Juvinal Dias “Akara”, hala'o enkontru ho Sekretáriu Estadu Arte no Kultura, Teófilo Caldas. Imajen Eugenio Pereira

DILI, 06 maiu 2019 (TATOLI)—Sekretáriu Estadu Arte no Kultura (SEK) koopera ho Sekretaria Estadu Komunikasaun Sosiál (SEKOMS) no mídia sira atu promove kultura liuhusi mídia komunikasaun sosiál.

Kultura ne’ebé parte tolu (SEK, SEKOMS no mídia) sei promove  mak hanesan uma lulik, aiknanoik, dadolin, múzika, dansa, hahán no hatais tradisionál. SEK no SEKOMS hili mídia Estadu hanesan Agência Tatoli, Rádio e Televisão de Timor-Leste (RRTL-ep), rádiu komunidade inklui mídia privada sira sai hanesan instrumentu ba promosaun.

Sekretáriu Estadu Kultura, Teófilo Caldas dehan, mídia iha papél importante atu divulga informasaun pozitivu hodi promove kultura iha rai laran no ba rai li’ur.

“Ami troka hanoin oinsá mak kria kooperasaun entre SEK no SEKOMS inklui Agência Tatoli no RTTL atu promove servisu kultura Timor-Leste nian hodi ita-nia povu inklui ema iha rai li’ur bele akompaña informasaun pozitivu kona-ba kultura ita-nian ne’ebé hala’o iha munisípiu hotu-hotu bele hetan suporta publikasaun hosi mídia,” dehan Teófilo ba Agência Tatoli iha edifísiu SEK, Praia dos Coqueiros, Dili, sesta (03/5/2019).

Teófilo hatutan, SEKOMS iha papél importante atu koordena ho liña ministériu hotu-hotu inklui instituisaun autónoma sira hodi promove servisu Estadu ba públiku.

Dala barak ema ko’alia kultura, tuir Teófilo, la’ós ko’alia de’it kona-ba uma lulik, tais, no múzika de’it, maibé kultura ne’e liga ba aspetu jerál oioin ne’ebé iha ligasaun ho moris iha sosiedade ida.

Kona-ba programa kultura ne’ebé sei promove iha mídia Estadu liuliu RTTL-ep mak kona-ba lansamentu Dokumentáriu Programa CPLP Audiovizuál “DOCTV CPLP III Musica Resistência” ne’ebé sei hala’o lansamentu iha edifísiu Muzeu Rezisténsia, segunda (06/05) ne’e, tuku 15:00 Otl.

Entretantu, iha programa seluk tan mak iha tinan 2020 ba oin sei promove mós grupu artista timoroan sira ne’ebé iha talentu kona-ba dansa, múzika, kulturál nu’udar rikeza TL.

 “Ba oin ne’e ita hakarak promove mós artista timoroan sira ne’ebé iha talentu kona-ba dansa, múzika, kulturál sai hanesan rikeza ba ita nia nasaun,” dehan Teófilo.

Nia afirma, governu hakarak promove grupu hirak ne’e atu reprezenta Timor-Leste halo promosaun kultura iha rai laran no rai li’ur.

Iha fatin hanesan, Sekretáriu Estadu Komunikasaun Sosiál (SEKOMS), Merício Juvinal Dias “Akara” prontu koordena ho SEK atu promove programa atividade kulturál liuhusi mídia Estadu inklui mídia privadu sira.

“Ida ne’e programa ida di’ak oinsá mak Tatoli no RRTL-ep bele koordena ho SEK inklui mídia privadu sira promove ita-nia kultura,” tenik Akara.

Akara haktuir, durante ne’e nia parte halo mós vizita ba mídia imprime sira iha TL no rádiu komunidade atu kontribui divulga informasaun servisu Estadu ba sosiedade.

Nia informa, ohin loron iha mídia sosiál facebook, dala ruma ema balun fó sai informasaun ho karáter propaganda ka lansa hoax (informasaun falsu) ba públiku ho maneira oioin, tanba ne’e, prezensa Agência Tatoli nu’udar mídia online Estadu iha devér halo klarifikasaun entrevista ho fonte kredível hodi fó sai informasaun loloos ba públiku.

Iha enkontru ne’e, Prezidente Agência Tatoli, José da Costa  hala’o mós introdusaun kona-ba servisu Agência Tatoli ne’ebé harii iha 27 jullu 2016 liu-ba, hosi Mandatu VI Governu Konstitusionál.

Tatoli, nia esplika, nu’udar fonte ofisiál informasaun instituisaun ka ajente informasaun ne’ebé na’in mak Estadu ho ninia papél halo kobertura no fahe informasaun importante, akuradu ba territóriu TL no mundu internasionál.

 “Tatoli nu’udar ajénsia Estadu nian hodi halo kobertura ba atividade Estadu nian tomak para públiku bele konsumu informasaun kona-ba atividade Estadu nian,” José haklaken.

José dehan, Tatoli hein bainhira SEK hala’o programa bele koordena ho redasaun hodi hola parte halo kobertura hodi fó sai informasaun.

Iha fatin hanesan, Prezidente Administrasaun RTTL-ep, Francisco da Silva “Gari”, hateten sira prontu koopera ho SEK promove atividade kultura liuhusi publikasaun iha televizaun no rádiu.

RTTL, tuir nia, durante ne’e sempre fó sai programa kultura liuliu serimónia rituál inaugurasaun uma lisan no programa seluk tan.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here