Diretór Ezekutivu no Prezidente Arquivo Museum de Resistência Timor-Leste (AMRT), Instituisaun Públiku (I.P), Hamar Antoninho Baptista Alves.

DILI, 6 maiu 2019 (TATOLI)—Diretór Ezekutivu no Prezidente Arquivo Museum de Resistência Timor-Leste (AMRT), Instituisaun Públiku (I.P), Hamar Antoninho Baptista Alves, hateten reseita hosi vizitante sira ne’ebé vizita ezibisaun permanente iha AMRT iha tinan 2018 tún liu kompara ho tinan 2017 no tinan 2016 tanba impaktu hosi impase polítika.

“Ha’u iha referénsia ne’ebé kompara ho tinan 2016 to’o 2018. Totál ema ne’ebé vizita kada tinan, ba tinan 2016 hetan reseita $4900,00 itál. Iha tinan 2017 tún ba iha $4345,00. Iha tinan 2018 reseita hosi vizita tún liu ba $2846,00,” dehan  Hamar ba jornalista Tatoli liuhusi entrevista eskluzivu iha nia kna’ar fatin, segunda (6/5/2019).

Normalmente, nia haktuir, atu hetan reseita hosi vizita, Muzeu Rezisténsia hahú estabelese sistema ida ho billete entrada (tama) haat (4) maka hanesan billete entrada estabelese ba labarik ki’ik-oan sira ho gratutita, billete ba labarik estudante sura ho nia kustu $25,0 cent kada folla, billete normál ho nia kustu dollar ida (aplika ba vizitante nasionál, turista no sidadaun hotu-hotu), billete ba ema sira ne’ebé idozu/a ho kustu  $50 cent no mós vizita giaun ho kustu $15,00.

Nia halaken, impase politika ne’e maka implika ema ka vizitante barak sai ba li’ur no mós vizitante sira mai iha rai laran [Timor-Leste] mós menus tebe-tebes.

Entretantu, Hamar esplika, AMRT iha objetivu prinsipál halo atendementu gratutita ka espesiál ba estudante sira hahú hosi ensiñu báziku to’o ensiñu superiór no kontinua konvida profesór sira ho estudante sira atu bele mai koñese istória TL liuhusi muzeu rezisténsia.

 Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here