Plenaria Parlamentu Nasionál (PN). Imajen/ António Gonçalves

DILI, 06 maiu 2019 (TATOLI) – Parlamentu Nasionál (PN) liuhosi sesaun plenária segunda-feira ne’e, fó votu saudasaun ba tinan 20 akordu 5 maiu 1999, ho votu unanimidade 53.

“Parlamentu Nasionál asinala komemorasaun tinan 20, asinatura akordu 5 maiu 1999 no presta omenajen ba timoroan sira ne’ebé luta atu mehi Timor-Leste independente sai realidade no povu amigu sira ne’ebé fó apoiu tomak ba auto-determinasaun,” refere deklarasaun PN ne’ebé lee husi Sekretária Meza, Maria Terezinha Viegas, iha Parlamentu Nasionál, segunda (06/05).

Akordu ne’e hanesan prosesu luta povu timoroan ba direitu auto-determinasaun no deside ninia destinu atu sai nasaun independente ida. Tanba ne’e, entre nasaun tolu hanesan Estadu Unidu Amérika (EUA), Repúblika Indonézia no mós Portugal realiza asinatura iha loron 5 maiu 1999 iha sidade Nova Iorke kona-ba kestaun Timor-Leste.

Akordu ne’e asina husi Ministru Negósiu Estranjeiru Portugal, Jaime Gama no Ministru Negósiu Estranjeiru Indonézia, Ali Alatas, sob-ospísius husi Sekretáriu Jerál Organizasaun Nasaun Unida (ONU), Kofi Annan.

“Akordu ne’e permite povu Timor-Leste, liuhosi meiu Konsulta Populár, ne’ebé pronunsia kona-ba proposta autonomia espesiál husi Repúblika Indonézia sei nafatin ho nasaun ne’e ou sai país independente no soberanu,” dehan Sekretária Meza, Maria Terezinha Viegas.

Nune’e mós biban ne’e fó marka importante ba istória no simboliza hili dalan ba liberdade no dame, demokrasia no dezenvolvimentu ne’ebé povu ho firme, mantein nafatin iha tempu naruk nia laran liuhosi luta independénsia.

Enkuantu, Deputada Bankada FRETILIN, Lídia Norberta hateten, akordu ne’e fó hanoin ba ita katak iha tinan 20 liubá, ONU halo esforsu makas atu Portugal no Indonézia fó dalan ba Timor-Leste atu deside futuru ba liberdade no dame iha ita-nia nasaun.

Xefe Bankada Partidu Demokrátiku (PD), António da Conceição agradese ba ONU nia konsisténsia ne’ebé dedika ba kazu Timor-Leste no diplomasia firme husi Portugal atu lori problema ne’e ba asinatura akordu ne’e.

Nune’e mós Xefe Bankada CNRT, Duarte Nunes admite loron ne’e istóriku tebes hodi determina Timor-Leste nia pasu foun iha istória ba luta independénsia.

“Hanesan loron ne’ebé fó oportunidade ba ita hodi povu bele deside nia destinu liuhosi referendum. Ita-nia oan sira ne’ebé sidauk iha momentu ne’ebá mós hatene ona no ita presiza tinan-tinan hanoin fila fali loron ida ne’e atu ita hotu hanoin katak iha loron ida ne’e ho apoiu husi ONU, Portugal ita bele hetan oportunidade atu bele deside ita nia destinu liuhosi referendum,” konklui reprezentante povu ne’e.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here