Porkuradór Jerál Repúblika (PJR), Jose Ximenes. Imajen Egas Cristovão

DILI, 06 maiu 2019 (TATOLI) – Prokuradór Jerál Repúblika (PJR), José da Costa Ximenes, garante suspeitu kazu matéria prima ba droga sei la halai lakon husi Timor.

“Ha’u hanoin la halai, tanba tribunál aplika medida kausaun, proibisaun auzénsia ne’ebé nia pasaporte sira iha hela tribunál, nia sidadaun timoroan, nia atu halai ba ne’ebé”, klarifika PJR, José da Costa Ximenes, ba jornalista sira hafoin hasoru malu ho Prezidente Repúblika, Francisco Guterres Lú Olo, iha Palacio Prezidensiál, Bairru Pité, Dili.

José da Costa Ximenes mós klarifika informasaun ne’ebé lansa iha públiku katak matéria prima balu lakon, ne’e la loos.

“Ha’u hakarak hateten, sasán ne’e mai hosi parking list nian haruka mai dehan iha 250 kilograma, maibé bainhira halo apreensaun, konfirma la to’o 250 kilograma, katak menus husi númeru ne’e, ne’ebé iha de’it maizumenus 220 kilograma, maibé ne’e matéria investigasaun maka sei hatene loloos”, hateten José da Costa Ximenes.

Entretantu, kazu ne’e akontese iha abríl 2019, liu husi desizaun primeiru interrogatóriu ba suspeitu ho inisiál A.L Tribunál Distritál Dili aplika medida kausaun auzénsia no Termu Identidade Rezidénsia (TIR).

Medida ne’ebé aplika ba suspeitu, tuir lei kódigu prosesu penál, artigu 192 (proibisaun atu sai) no artigu 193 (obrigasaun atu hela iha uma).

http://www.tatoli.tl/2019/04/mf-atualiza-kazu-importasaun-materia-bazika-droga-ba-pm/

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here