Administradór Sentru Informasaun Turístika (SIT) Ministériu Turizmu, Komérsiu no Indústria (MTKI), António da Silva. Imajen/Egas Cristovão

DILI, 06 maiu 2019 (TATOLI)-Estatístika hosi Sentru Informasaun Turístika (SIT), Ministériu Turizmu, Komérsiu no Indústria (MTKI), hatudu Kristu Rei hanesan fatin favoritu iha kapitál Dili ba turista sira atu vizita.

Tuir persentajen dadus 2017 nian hosi SIT hatudu Kristu Rei iha porsentu 89 mak ema vizita no destinasaun  tuir mai  ba turista sira mak Merkadu Tais iha Colmera ho persentajen 50, Muzeu Rezisténsia (35%) no  Area Branca iha porsentu 34.

Administradór SIT-MTKI, António da Silva, hateten, númeru ne’ebé hetan ne’e bazeia ba peskiza ne’ebé Ministériu Turizmu halo hamutuk ho Fundasaun Ázia.

“Iha mós vizita ba munisípiu sira ein jerál Lautein, mas ita hatete kondisaun ne’ebé ita iha. Ita-nia vizitor sira mai Timór tenta posivel atu esplora hotu territóriu tomak, mas ita haree fali ba konetividade, transporte lokál sai obstákulu, infraestrutura no mós fasilidade báziku sira seluk hanesan akomodasaun iha sítiu turístiku sira balu laiha no restaurante no ema ne’ebé fó atendimentu servisu turístiku”, informa António da Silva, ohin, iha SIT Lesidere.

Husi númeru turista sira mai ne’e barak liu maka Austrália ho porsentu 54 ne’ebé kompostu husi Darwin 24%, Melbourne (24%), Sydney (14%) no Brisbane (14%). Aléinde ne’e, Indonézia 25%, Nova Zelándia (4%) ho mós Xina.

Jornalista: Maria Auxiliadora

Editór: Francisco Simões

HAKEREK NO HATÁN

Please enter your comment!
Please enter your name here