Prezidente Civil Society Education Partnership (CSEP), Verónica de Sousa (karuk), Sekretária Estadu ba Igualdade no Inkluzaun, Maria José da Fonseca Monteiro de Jesus (klaran), Adjunta Koordenadora Asia South Pacific Association For Basic And Adult Education (ASPBAE), Helen Dabu (liman loos), ko’alia kona –ba hasa’e kualidade juventude iha peskiza ba área edukasaun. Imajen Agência Tatoli/Egas Cristóvão

DILI, 06 maiu 2019 (TATOLI)—Juventude hosi munisípiu lima (5) tuir formasaun kona-ba oinsá halo peskiza iha área edukasaun ne’ebé hala’o iha salaun Fundasaun Alola, Mascarenhas, Dili, segunda ne’e.

Formasaun ne’e foka liu-ba oinsá identifika joven sira ne’ebé vulnerável liu iha munisípiu lima ne’ebé mak iha área remota.

Partisipante ne’ebé partisipa iha formasaun ne’e hamutuk ema na’in 18. Joven hirak ne’e mai hosi Munisípiu Aileu, Bobonaro, Liquiçá, Ainaro no Ermera. Enkuantu, formadór ba formasaun mai hosi Filipina.

 Prezidente Civil Sosciety Education Partnership (CSEP), Verónica de Sousa, hateten formasaun ne’e espesífiku ba peskiza kona-ba partisipasaun foinsa’e sira ba edukasaun iha área remota.

“Peskiza oinsá mak ita atu haree ba iha partisipasaun feto no mane iha área edukasaun ninian no rezultadu balun hosi peskiza ne’e sei hato’o ba governu nune’e governu halo polítika ida di’ak,” Verónica ba jornalista sira iha salaun Fuundasaun Alola, segunda (6/5).

Bainhira peskiza ne’e ramata, nia dehan, sei aprezenta ba iha osan na’in Asia South Pacific Association for Basic and Adult Education (ASPBAE), iha Filipina.

Sekretária Estadu ba Igualdade no Inkluzaun, Maria José de Jesus, agradese ba CSEP tanba rekolla joven sira hosi munisípiu tuir formasaun.

“Ha’u hanoin ne’e (peskiza) inisiativa ida di’ak iha área edukasaun tanba ita hatene katak iha Timor peskiza mínimu tebes,” governante ne’e hateten.

Governante ne’e mós konsidera joven sira ne’ebé partisipa iha formasaun ne’e importante tebes ba prosesu dezenvolvimentu oioin iha rai-laran.

“Ami serbisu hamutuk ho grupu parseria sira hotu hanesan organizasaun sosiedade sivíl hodi promove igualdade no inkluzaun nian hodi nune’e feto sira mós bele asesu ba edukasaun no hasa’e feto sira iha polítika,” katak nia.

Iha okaziaun ne’e, Maria José promete kontinua fó apoia ba organizasaun sira ne’ebé fó formasaun ba foinsa’e sira kona-ba peskiza iha área edukasaun, tanba rezultadu hosi kualkér peskiza bele ajuda governu halo polítika ida di’ak liu no bele fó rekomendasaun ba governu.

 Entretantu, Adjunta Koordenadora Rejionál Asia South Pacific Association for Basic and Adult Education (ASPBAE), Helen Dabu hakarak kongratula CSEP (Civil Sosciety Education Partnership), ne’ebé organiza formasaun ne’e.

“Ami iha inisiativa hodi hala’o formasaun ba joven sira tanba joven sira presiza rekolla isu iha área rurál,” Helen tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here