Turista feto ida bainhira haree produtu lokál Boneka Ataúru nian.Imajen/Egas Cristovão.

DILI, 06 maiu 2019 (TATOLI)-Turista individuál ne’ebé halo sira nia viajen mai Timor-Leste iha tinan ne’e uitoan de’it kompara ho tinan sira liu ba.

Tuir dadus Sentru Informasaun Turístika (SIT) Ministériu Turizmu, Komérsiu no Indústria (MTKI) hatudu katak, vizitante ka turista individuál ne’ebé mai Timor-Leste, hahú hosi  Janeiru to’o Maiu ne’e, iha de’it ema purvolta na’in-50.

Kompara karik ho dadus 2018 dezde SIT harii iha Marsu, tinan kotuk, turista individuál sira ne’ebé rejistadu iha ema na’in-400.

“Mas triste uitoan tanba ita iha 2018 de’it, ita hahú loke iha Marsu ne’ebá to’o fin ano 2018 iha 360-resin. Agora, 2019 ita tama tiha ona iha Maiu, mas ita iha purvolta másimu ema na’in 50 de’it”, informa Administradór Sentru Informasaun Turístika (SIT) Ministériu Turizmu, Komérsiu no Indústria (MTKI), António da Silva, ohin, iha SIT Lesidere, Dili.

Bainhira haree ba númeru ne’e, tuir António da Silva, obstákulu ne’ebé Timor-Leste hasoru maka billete aviaun ne’ebé daudaun ne’e karu tanba haree maneira viajen turista sira ne’e barak liu mak ho aviaun.

Tuir Polítika Turizmu to’o 2030 Timor-Leste sei fó benvindu ba turista internasionál na’in-200.000 kada tinan, ne’ebé sei prodús rendimentu millaun US$150 no fó empregu diretamente ba traballadór na’in-15.000.

“Ha’u individualmente pániku uitoan tanba ita tinan 11 de’it atu bá 2030, mas ita iha espíritu boot katak ita sei bele atinje númeru ne’ebé maka ita target iha polítika nian no ita espera bele liu tan hosi ida ne’e”, hateten António da Silva.

António otimista tanba ho konstrusaun aeroportu espera bele la’o tuir oráriu ne’ebé iha no bele atrai ema, no mós portu Dili bele di’ak ho tan iha atividade sira ne’ebé halo formulasaun pakote di’ak hodi atrai ró pasajeiru sira tanba Darwin kada tinan sira simu kruzeiru purvolta 60 no fatin besik hela Timor-Leste.

“Entaun hein de’it ita-nia estratéjia di’ak para ita bele atrai ró sira ne’e. Husi Lombok (Indonézia) rasik, ami halo enkontru ho autoridade marítima hatete katak sira iha 2019 ne’e to’o 2020 sira tarjetu simu ró 196”.

Bainhira haree hosi lala’ok sirkuitu ró kruzeiru nian ne’e, Timor-Leste iha poténsia boot no espera bainhira halo promosaun di’ak sira bele para iha Timór loron ida hanesan hodi esplora sidade tanba portu ne’e iha kedan Dili, nune’e atrativu loos. Tanba ne’e promosaun no servisu hamutuk setór privadu sira halo formulasaun estratéjia ne’ebé di’ak hodi bele promove.

Enkuantu númeru turista independente sei menus, maibé Timor-Leste iha Janeiru to’o Abríl ne’e hetan ona vizita husi ró kruzeiru hamutuk haat no tuir konfirmasaun ne’ebé iha katak tinan ne’e iha ró ualu (8) mak mai, haat tama no seluk sei mai tan no iha ró rua ne’ebé sei mai hotu, mas nia konfirmasaun data loloos seidauk tama.

Atu bele promove Timor-Leste ba kruzeiru sira ne’ebé vizita nasaun viziña sira ne’e, Administradór ne’e dehan, turista normálmente buka destinasaun foun atu bá, tinan-tinan hakarak esplora nafatin no atu promove loos destinasaun ida ne’e la’ós de’it servisu Governu nia, maibé setór privadu mós importante hotu tanba indústria turizmu ne’e indústria ne’ebé fa’an ba li’ur, tanba ne’e tenke halo pakote ho di’ak, jestaun di’ak ba sítiu sira ne’e, hadi’ak kualidade servisu para bele promove.

 Jornalista: Maria Auxiliadora

Editór: Francisco Simões

HAKEREK NO HATÁN

Please enter your comment!
Please enter your name here