Prezidente IPG, Hélio C. Guterres

DILI, 06 maiu 2019 (TATOLI)—Institutu Petróliu no Jeolojia–Institutu Públiku (IPG-sigla portugés) durante ne’e halo ona peskiza hodi identifika rikusoin lubuk ida iha rai leten área Timor-Leste.

IPG nu’udar instituisaun Estadu Timor-Leste ne’ebé estabelese iha 18 de jullu 2012 liuhusi hosi dekretu lei nú. 33/2012, ho objetivu prinsipál mak atu halo investigasaun sientífika no kolleta dadus jeolojia iha Timor-Leste hanesan gás, petróliu, rekursu minerál, bee no rekursu jeolójiku sira seluk.

Rikusoin hirak ne’ebé ekipa IPG identifika iha área Timor-Leste kompostu hosi fatuk, ahu, fatuk potásiu, sulfuriu, besi musan, dolemite, osan mean, osan mutin, fosfatu, masin, gás naturál, jesu, kromite, clay ceramik, maganesite,  bentonite arjila, maganesa, marmore, rai henek boot,  infiltrasaun mina, kobra, volastonite  no rikusoin seluk ne’ebé  ekipa jeolojia IPG sei sei buka nafatin iha kada munisípiu.

“Ita identifika rikusoin ne’e lubuk ida  ne’ebé ita presiza fó sai nafatin hodi ita labele dependénsia nafatin ba petróliu, tanba ita iha fatuk, ahu, fatuk potásiu, gás naturál, simente, marmore no seluk tan,” informa Prezidente IPG, Hélio C. Guterres, ba jornalista sira iha nia kna’ar fatin, Elemloi, Delta, Comoro, segunda ne’e.

Nia hatutan, agora dadaun ekipa IGP kontinua dezkola ba kada munisípiu hodi halo peskiza iha Jaco-Lautem to’o Rejiaun Administrativa Espesiál Oé-Cusse Ambeno (REAO).

Tuir lei, IPG halo de’it identifikasaun no prosesu atu halo esplorasaun ba rikusoin hirak ne’e depende ba Governu Timor-Leste hamutuk ho Autoridade Nasionál Petróliu no Minerál (ANPM) maka sei regula.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here