Xefe Estadu Maior F-FDTL, Koronél Calistro Santos ‘Coliáti’ (klaran) hamutuk ho Prezidente Institutu Petróliu no Jeolojia (IPG-sigla portugés), Hélio C. Guterres (liman loos), lansa formasaun ho tema “Planeamento Topografia e Sistema de Tecnologia Mapeamentu” iha edifísiu IPG, Elemloi, Delta, Comoro, Dili, Segunda (06/05). FOTO :TATOLI/Eugénio Pereira

DILI, 06 maiu 2019 (TATOLI)—Komandu FALINTIL-Forsa Defeza Timor-Leste (F-FDTL) kria kooperasaun ho Institutu Petróliu no Jeolojia (IPG-sigla portugés) fó formasaun ba membru F-FDTL na’in lima hodi aprende kona-ba formasaun espesialidade topografia no sistema teknolojia Geographic Information System (GIS) no Global Positioning System (GPS).

Formasaun ho tema “Planeamento  Topografia e Sistema de Tecnologia Mapeamentu” ne’e lansa direta hosi Xefe Estadu Maior F-FDTL, Koronél Calistro Santos ‘Coliáti’ hamutuk ho Prezidente Institutu Petróliu Jeolojia-Institutu Públiku (IPG-sigla portugés), Hélio C. Guterres iha edifísiu IPG, Elemloi, Delta, Comoro, Dili, segunda ne’e.

Membru F-FDTL sira ne’ebé sei hetan formasaun hosi Divizaun Sistema Informasaun IPG kompostu hosi sarjentu na’in rua (2) no ofisiál na’in tolu (3). Sira sei tuir formasaun hahú 06-17 Maiu.

Xefe Estadu Maiór F-FDTL, Coliáti dehan Komandu F-FDTL sente agradese tebes ho programa IPG hodi koopera fó formasaun ba membru sira.

Coliáti husu ba membru sira atu uza tempu semana rua tuir treinamentu ho didi’ak hodi aprende oinsá halo mapeamentu ida di’ak.

“Ida ne’e kooperasaun ida di’ak entre forsa armada ho IPG hodi fó treinamentu iha rekursu umanu iha área topografia no sistema teknolojia mapeamentu. Tanba nu’udar militár forsa ida tenki koñese uluk mapa Timor ne’e oinsá, hodi nia bele domina mapa Timor no koñese karaterístika rai Timor ne’ebé domina ho foho mak barak,” nia esplika.

Coliáti hatutan, forsa tenki aprende halo mapeamentu no uza teknolojia modernu, nune’e to’o funu ruma forsa bele domina mapa oinsá halo gerrilla kontra inimigu ho preparasaun ne’ebé profisionál.

“Tenke domina mapa nune’e bainhira inimigu ida subar iha fatin ruma ita bele haree no deteta liuhusi mapa. Entaun, ho formasaun ne’e ami haksolok  tanba IPG bele fahe koñesimentu ba forsa kona-ba mapa no ortografia,” nia agradese.

Hafoin tuir formasaun, Coliáti informa, membru F-FDTL sira ne’e fila sei sai fali instrutór oinsá atu dezeña hodi fahe tutan esperiénsia ba membru F-FDTL sira seluk.

Durante ne’e, nia haktuir, Komandu F-FDTL iha ona ekipamentu modernu atu halo estudu kona-ba mapeamentu, maibé tanba menus rekursu umanu, tanba ne’e kria kooperasaun hodi fó treinamentu.

Entretantu, Prezidente IPG, Hélio C. Guterres hato’o agradese tanba Komandu F-FDTL bele fó fiar ba IPG oinsá fahe matenek ba forsa sira atu aprende halo mapa ida ho di’ak.

“Ami agradese hodi bele fahe matenek ba membru F-FDTL sira, tanba mapa importante ba forsa sira. Ita hein ita nia forsa sira bele aprende buat barak oinsá bele lee no halo mapa ida ho di’ak,” nia tenik.

Hélio dehan, forsa presiza domina mapa, tanba mapa sai hanesan informasaun importante ba estratéjia, planeamentu no halo asaun ba kualkér atividade iha terenu.

“Mapa hanesan dalan ida ita bele subar iha fatuk kuak ka rai kuak fatin barak, maibé bainhira ita domina mapa ita bele deteta ita-nia paradeiru ho ajuda hosi teknolojia,” nia hateten.

IPG salienta katak IPG iha ekipamentu sufisiente hodi treina membru F-FDTL sira oinsá uza software halo mapa báziku ida di’ak ne’ebé hetan apoiu hosi Governu Timor-Leste.

Nia esklarese, formasaun ida ne’e nu’udar etapa primeiru no ba oin IPG kontinua simu formandu hosi instituisaun Estadu sira seluk ne’ebé presiza hasa’e rekursu iha mapeamentu nian.

 Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here