DILI, 06 maiu 2019 (TATOLI)—VIII Governu Konstitusionál liuhusi Sekretáriu Estadu Arte no Kultura, koordena ona ho Timor Aid, Fundasaun Alola, Sekretaria Ezekutiva Komisaun Nasionál ba UNESCO, sei hatún ekipa halo peskiza ba tais iha fronteira tolu mak hanesan Munisípiu Bobonaro, Covalima no Rejiaun Administrativa Espesiál Oé-Cusse Ambeno (RAEO).

Governu hili fronteira tolu ne’e sai sentru peskiza hodi bele identifika tais ho ninia kór no motivu ne’ebé deferente atu bele hili ida entre tolu ne’e lori ba rejista iha livru boot Organizasaun Nasaun Unida ba asuntu Edukasaun, Sientífika no Kultura (UNESCO-sigla inglés).

“Agora Diresaun Patrimóniu Kulturál no Diresaun Arte Indústria Kriatividade Kulturál serbisu ho UNESCO halo peskiza ida iha Covalima, Bobonaro no Oé-Cusse,” dehan Sekretáriu Estadu Teófilo ba Agência Tatoli iha nia kna’ar fatin, Praia dos Coqueiros, Dili, sesta (03/5/2019).

Razaun halo peskiza tais iha fronteira tolu, Teófilo esplika, atu evita problema disputa direitu na’in ba tais entre povu Timor-Leste no sidadaun Indonézia iha Atambua ba to’o Kefa.

“Na’in ba tais loloos ne’e mak Timor-Leste,  maibé povu Indonézia iha Atambua to’o Kefa sira mós dehan tais na’in mak sira. Tanba ne’e mak ita halo peskiza ne’e para ba rejista lalais iha UNESCO hodi rekoñese tais ne’e na’in loloos mak Timor-Leste,” nia hateten.

Tuir kalendáriu governu, nia tenik, sei lori ofisilamente tais ne’e ba rejistu iha UNESCO iha tinan 2020.

Teófilo informa katak bainhira tais Timor rejista ona iha UNESCO marka istória importante ba identidade Timor ba mundu tomak tanba tais hanesan hena tradisionál ida ba sosiedade Timor ne’ebé halo ho liman “soru tais” atu hatudu identidade rasik.

“Bainhira ema uza ka hatais tais hanesan nesesidade importante ba serimónia simu bainaka no serimónia rituál adat nian no hatais ba nesesidade loro-loron. Tais ninia futus ka amostra hatudu estadu sosiál ema idak-idak ka grupu sira iha Timor-Leste,” governante ne’e haklaken.

Prosesu halo tais maka hanesan hahú hosi rekolla ai abut, ai tahan, hakoris ai abut to’o soru tais no dalan seluk tan mak halo tais hosi kabas hamosu furak oioin iha tais ida.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here