Ministru Interiór Interinu, Filomeno da Paixão de Jesus

DILI, 06 maiu 2019 (TATOLI)—Ministru Interiór (MI) Interinu, Brigadeiru Jenerál Filomeno da Paixão de Jesus, husu ba funsionáriu públiku Ministériu Interiór atu serbisu la’o tuir prinsípiu Jerál Administrasaun Públika.

Ministru dehan, bainhira funsionáriu sira serbisu la tuir regra, di’ak liu sai hosi serbisu tanba la presta serbisu di’ak ba instituisaun Estadu atu hetan governasaun di’ak.

 “Ha’u husu ba imi hotu atu serbí ho di’ak iha administrasaun públika. Tanba funsionáriu ne’e hanesan mákina Estadu Timor-Leste ninian, entaun serbisu tenki tuir Prinsípiu Jerál Administrasaun Públiku ninian. Se serbisu la kumpri regra di’ak liu sai,” apela Ministru Filomeno durante dirije serimónia isár bandeira nasionál iha resintu MI, Vila-Verde, Dili, ne’ebé Agência Tatoli asesu hosi Serbisu Relasaun Públika MI, segunda ne’e.

Nia husu ba funsionáriu sira atu serbisu tuir regra no hatudu imparsialidade no transparénsia iha fatin serbisu.

Ba Diresaun Lojístika no Aprovizionamentu, ministru ne’e husu tenke responsabilidade ba serbisu hotu ho imparsialidade no transparénsia, kontrola distribuisaun transporte Estadu nian tuir lei, tanba bainhira sala utiliza sei viola ragra.

“Ha’u mak sei ba hatán iha deputadu no tribunál sira. Tanba ne’e, ha’u husu distribuisaun tenki tuir lei. Labele distribui tuir imi nia hakarak de’it,” nia fó atensaun.

Nune’e mós ba parte Diresaun Nasionál Finansa, hanesan instituisaun ida ne’ebé atende povu ho karáter urjente iha situasaun ida nia laran, governante ne’e hameno, bainhira diresaun tutela sira entrega CPV (Certificate and Payment Voucher) tarde, lalika hein malu se lae bele prejudika fali ema seluk nia direitu no serbisu seluk ne’ebé urjente.

Ministru Filomeno hatutan, dala barak funsionáriu sub-ordinadu sira halo serbisu la loos tanba diretór no xefe departamentu mak la loos.

Tuir nia katak regra hosi Komisaun Funsaun Públika (KFP) klaru tiha ona, maibé falla hosi implementadór sira.

“Xave importante iha instituisaun Estadu mak ema hotu serbisu tenki disiplina, respeita irárkia, halo serbisu ho didi’ak, buka atu serbisu hamutuk hodi tulun ministériu ida ne’e la’o ba oin,” Filomeno sujere.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here