Prezidente Timor Gap Francisco Monteiro,Imajen/Egas Cristovão

DILI, 03 maiu 2019 (TATOLI) – Kompañia nasionál Timor Gás no Petróleu (Timor GAP) Empreza Públika, sei hasoru malu ho Woodside iha Perth, Austrália hodi fahe informasaun ba malu oinsá dezenvolve kampu Greater Sunrise no dokumentu importante saida mak presiza diskute ho autoridade reguladór no konsulta ho Governu para lori projetu ne’e bá oin.

Soru-mutu ne’e nu’udar planu prioridade ba Timor GAP hafoin konklui prosesu ba akizisaun ConocoPhillips no Shell Energy, ne’ebé akontese ona foin lalais ne’e iha loron 16 fulan-abríl, iha Singapura.

Prezidente no Diretór Ezekutivu (CEO-sigla inglés) Timor GAP, EP, ba TATOLI iha ninia servisu fatin andár 3 sentru supermerkadu Timor Plaza, sesta, (3/5) katak, Timor GAP nafatin halo preparasaun no serbisu tékniku lubuk ida dezde 2007 to’o agora.

Nia hatutan iha ona estudu relevante ne’ebé hakbiit para bele lori prosesu ne’e to’o ohin loron, nune’e bele asegura Fronteira Marítima katak pipa ne’e labele bá Austrália, labele halo iha tasi-laran, maibé lori mai Timor-Leste no asegura Timor-Leste nia partisipasaun iha GS.

Francisco da Costa Monteiro hatutan tan preparasaun sira ne’e la’o tiha ona, kontinua nafatin no sei la’o maka’as iha futuru.

“Polítika ne’ebé Governu estabelese maka ita tenke target ba dezenvolvimentu kampu ne’e iha 2020-2021 komesa konstrusaun depois iha 2025-2026 produsaun. Ida ne’e maka ita bele dehan desizaun ka orientasaun husi Estadu Timor-Leste nian liuhusi Primeiru-Ministru ho señór Kay Rala Xanana Gusmão rasik, reprezentante espesiál ba asuntu Fronteira Marítima, maibé mós asuntu espesífiku ba dezenvolvimentu iha petróleu nian”, Francisco afirma.

Ho orientasaun ne’e maka Timor GAP ka’er no serbisu sira ne’ebé nesesáriu atu atinje ida ne’e maka serbisu tékniku komersiál ne’ebé presiza elabora ho konsultasaun, diskusaun ho konsórsiu (joint venture) sira.

“Saida maka ami presiza halo? Dahuluk, iha parte upstream nian ko’alia ho parseiru joint venture sira hanesan Woodside ho Osaka para sira mós aliña ho ita-nia planu tempu ne’ebé trasa ona depois haree katak karik estudu enjeñaria tékniku balu ne’ebé nesesáriu ne’ebé ami tenke aserta hamutuk, rezerva kampu Greater Sunrise ne’e hira loos para ami bele hamutuk aseita númeru ida de’it, kustu ne’e hira loos para ami bele aseita katak númeru ida de’it maka hotu-hotu ka’er. Depois kálkulu project economic nian oinsá no mós planu atu implementasaun nian”.

Tanba ne’e, sasán sira ne’ebé Timor Gap presiza halo iha tinan ne’e nia laran para antes tinan ikus, bele asina ona ou aprova konseitu dezenvolvimentu kampu nian, nune’e iha tinan oin bele halo front end engineering design atubele halo planu dezenvolvimentu kampu, hafoin ne’e hotu iha 2020-2021 halo konstrusaun.

Francisco salienta iha parte rai-maran nian kontinua engage (kontakta) ho populasaun sira iha Beasu para bele identifika rai ho proprietáriu sira ne’e, bainhira konstrusaun akontese iha 2020-2021 ne’e buat hotu loos ona. Tanba ne’e serbisu husi ekipa Timor Gap la’o hela, informa hela ekipa interministeriál para halo planu iha rai-maran nian la’o nafatin no tasi-laran mós kontinua.

“Estudu ambientál ne’e ami halo tiha ona strategic environment impact assessment ne’e halo kleur ona, agora, ami liuhusi dekretu lei kona-ba ambiente nian halo hela, termu referénsia aprova ona, estudu komesa daudaun hela, tinan ida ne’e hein katak finaliza ona”.

Sobre envolvimentu Timor Gap nian iha esplorasaun mina no gás, hanesan kompañia nasionál hanesan mós nasaun sira seluk ne’ebé maka prodús mina, normalmente sei iha kompañia nasionál para bele masimiza partisipasaun nasaun nian iha prosesu esplorasaun no Timor Gap harii husi dekretu lei ida ne’ebé fó kbiit atu envolve.

Bainhira Timor Gap atu envolve iha esplorasaun, tuir dekretu lei empreza ne’e rasik mós presiza iha rezolusaun husi Konsellu Ministru depois tenke mós hetan kontratu esplorasaun ne’ebé asina husi Timor Gap, parseiru konsórsiu sira ho Autoridade Nasionál Petróleu ne’ebé reprezenta ministériu no ida ne’e Timor Gap laiha problema ho asuntu refere.

“Se ko’alia kona-ba preparasaun institusionál, rekursu umanu ne’e prosesu ida dinámiku, ami prepara tiha balun ona, maibé lato’o nafatin no ita sei kontinua prepara, mas ami kontente tanba iha prosesu dezenvolvimentu institusionál ne’e mós Timor Gap konsege ona hetan sertifikasaun internasionál, ISO certification ba 9001, 14001 ho 18001  ne’e ba jestaun, ambiente ho seguransa nian”.

Sertifikasaun ne’ebé fó husi empreza DNV.GL (empreza ne’ebé rejista klasifikasaun) ne’e rigorozu tebes tanba fulan neen-neen mai halo auditoria para haree prosedimentu sira ne’ebé estabelese tuir duni padraun Organizasaun Internasionál ba Padronizasaun (ISO-sigla inglés) halo.

Akompaña mós:https://l.facebook.com/l.php?u=https%3A%2F%2Fwww.youtube.com%2Fwatch%3Fv%3DS1Eipi-G68w%26fbclid%3DIwAR1wsBDBNusTCJQJJXP7squy_jHh4LUILOyG3v3-pKl0Vpeq3oNsORhNGvI&h=AT1RrMHMGrDZn03aAx3YNDl9gxn6SGZ7y5EQczFJfokPMT9Sl0ZXep7S-T8t70VdkQzPr2LOg3G5WOFxJTXKpYorTBAie4mWLTKrme_jDAJyevCJVCboDSfG7SXewisrHTc

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here