Prezidente Timor GAP, EP, Francisco Monteiro. Imajen Egas Cristovão

DILI, 03 maiu 2019 (TATOLI) – Investimentu ne’ebé Estadu Timor-Leste halo liuhusi kompañia nasionál Timor Gás no Petróleu, Empreza Públika (Timor GAP, EP) tuir akordu jestaun atualizadu ne’ebé maka asina husi Banku Sentrál Timor-Leste ho Ministériu Finansa katak jurus ba investimentu iha Timor GAP, EP porsentu 4.5 pur anu depois tinan ualu iha períodu grasa (grace period) maka foin selu.

“Ami-nia akordu komersiál ida ho banku sentrál, akordu ida ba empréstimu ka investimentu husi banku sentrál mai Timor GAP para uza ida ne’e hodi hola asaun ne’e”, afirma Prezidente no Diretór Ezekutivu Timor GAP, EP, Francisco da Costa Monteiro, ba TATOLI iha ninia servisu fatin andár 3 sentru supermerkadu Timor Plaza, ohin.

Nia hatutan: “Husi Governu, Parlamentu aprova alterasaun ba Lei Atividade Petrolífera permite katak Timor Gap bele hetan asesu ba investimentu husi Fundu Petrolífera, maibé tenke liuhusi Ministériu Finansa ho BSTL (Banku Sentrál Timor-Leste)”.

Tanba ne’e Ministériu Finansa halo ona prosedimentu tuir lei haruka, depois fó instrusaun ba banku sentrál no negosia ho Timor GAP katak investimentu milliaun $650 ne’e konsidera hanesan investimentu ida husi Fundu Petróleu.

“Entaun investimentu ida ne’e tenke iha nia jurus (funan) no bainhira tenke selu no selu tinan hira ne’e iha ne’ebá iha. Ami iha grace period katak iha tinan ualu nia laran ne’e laselu depois de ne’e tenke selu. Iha tiha produsaun ona maka selu”, katak.

Tanba ne’e Timor GAP, EP garante katak iha 2025-2026 tenke prodús ona.

Iha lansamentu relatóriu trimestrál (janeiru-marsu 2019) Fundu Petróleu (FP) nian iha 2 marsu ne’e, Vise Governadór Banku Sentrál Timor-Leste (BSTL), Venancio Alves Maria, katak desizaun Estadu Timor-Leste nian atu sosa interese ConocoPhillips ho Shell Energy iha konsórsiu (joint venture) iha Greater Sunrise, BSTL simu instrusaun husi Ministériu Finansa iha inísiu marsu 2019 no prosesu hotu konklui iha fulan refere nia klaran, iha 10 abríl ne’e, BSTL transfere ona milliaun $650 ba Timor GAP nia subsidiáriu haat hodi bele investe tutan ba konsórsiu GS tuir desizaun Estadu nian.

Instrusaun ministra nian suporta ho diploma ministeriál no hetan apoiu husi rezolusaun Konsellu Ministru kona-ba investimentu foun iha kategoria alternativa liuhusi Timor Gap, uza porsentu 5 alokasaun investimentu FP tuir artigu 14.5 Lei FP no mós Lei Atividade Petrolífera ne’ebé altera ona.

Tuir perspetiva BSTL katak transferénsia milliaun $650 ne’ebé halo ne’e trata hanesan investimentu iha Timor Gap.

“Publikasaun akordu jestaun atualiza ne’ebé maka asina husi BSTL ho Ministru Finansa ninia investimentu iha Timor GAP ne’e nia jurus porsentu 4.5 ho nia durasaun tinan ualu”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here