Primeiru-Ministru (PM), Taur Matan Ruak, Kinta (02/5/2019), hato’o felisitasaun ba profisionais jornalista timoroan ho mós jornalista hotu iha mundu tomak ba loron mundiál liberdade imprensa ne'ebé selebra iha loron 3 Maiu, tinan-tinan. Imajen/GPM

DÍLI, 02 maiu 2019 (TATOLI)—Primeiru-Ministru, Taur Matan Ruak, ohin, hato’o felisitasaun ba profisionais jornalista timoroan ho mós jornalista hotu iha mundu tomak.

Liuhosi nia lia-menon ba loron mundiál liberdade imprensa nian, 3 Maiu, tinan ne’e, Primeiru-Ministru, Taur Matan Ruak, fó hanoin hikas katak, imprensa nu’udar mós pilár nasaun nian hodi promove no hametin demokrasia iha sosiedade nia leet.

 “Ohin (aban-red), loron ida-ne’ebé jornalista iha mundu tomak, nune’e mós jornalista iha Timor-Leste, komemora Loron Liberdade Imprensa nian. Nu’udar Xefe Governu, hato’o ha’u-nia felisitasaun ba profisionais sira iha loron espesiál ida-ne’e, hodi fó-hanoin hikas katak imprensa nu’udar mós pilár nasaun nian hodi promove no hametin demokrasia iha sosiedade nia leet”,  afirma Taur Matan Ruak iha nia lia menon liuhosi komunikadu ne’ebé Ajénsia TATOLI simu hosi Gabinete Primeiru-Ministru nian.

Iha loron ida-ne’e, Primeiru-Ministru Taur Matan Ruak, hakarak enkoraja mós profisionais mídia komunikasaun sosiál sira atu mantein, iha tempu hotu-hotu, jornalista sira nia responsabilidade bainhira hala’o knaar bá buka no fó-sai informasaun sira, presizamente kumpre duni kódigu de étika ne’ebé orienta profisionais jornalista hodi prodús informasaun ne’ebé kredivel no iha balansu ba sosiedade sira.

“Ha’u rekoñese papél imprensa nian dezde tempu rezisténsia to’o mai iha ukun-an nia laran importante tebes, i ohin iha faze konstrusaun Estadu nian, ha’u fiar katak papél mídia nian sei fó ninia kontribuisaun boot liután ba prosesu dezenvolvimentu nasionál”, hateten Taur Matan Ruak.

“Ikus, ha’u hakarak hato’o ha’u-nia omenajen ba jornalista hirak ne’ebé lakon sira nia vida iha hala’o knaar, i ha’u-nia dezeju atu imi hotu ne’ebé oras ne’e hala’o daudaun knaar jornalizmu nian, bele hetan protesaun ne’ebé di’ak no susesu iha imi-nia servisu tomak. Parabéns Ba Loron Mundiál Liberdade Imprensa Nian! Parabéns Ba Jornalista Timor-Leste!”.

EKIPA

HAKEREK NO HATÁN

Please enter your comment!
Please enter your name here