DÍLI, 02 mei 2019 (TATOLI)-Prezidente Repúblika, Francisco Guterres Lú Olo, husu ba Governu da-ualu ne’ebé lidera hosi Primeiru-Ministru, Taur Matan Ruak, atu kria polítika ba planeamentu urbanu iha sidade Dili, inklui territóriu tomak.
Pedidu ne’e hato’o diretamente hosi Prezidente Repúblika ba Primeiru-Ministru Taur Matan Ruak, bainhira aprezenta progresu servisu governu nian durante semana ida ne’e liuliu planu ba implementasaun projetu konstrusaun Portu Beasu, Viqueque, ne’ebé estabelese hosi Timor Gap no Kompañia konstrutora ida hosi Xina ho valor orsamentu millaun US$943.
Alende ne’e, kona-ba programa Millennium Challenge Corporation (MCC-sigla Inglés) ho governu Timor-Leste atu implementa maka millennium challenge compact liuhosi projetu bee no saneamentu iha sidade Dili ho valor millaun US$200-resin.
“Prezidente alerta hela governu atu projetu sira ne’e bele lao mais fó atensaun hela ba planeamentu urbanu, ne’ebé ha’u rejista preokupasaun Prezidente”, hateten Taur Matan Ruak, ohin, ba jornalista sira iha Palásiu Prezidensiál Bairru-Pité, Dili.
Ideas seluk hosi diskusaun entre Prezidente Repúblika ho Primeiru-Ministru maka preparasaun ba komemorasaun loron Konsulta Popular (REFERENDUM), 30 Agostu no 20 Setembru loron INTERFET tama Timor Leste.
“Ita konvida konvidadu barak (Xefe Estadu no Governu) ne’ebé prezidente preokupa loos kona-ba ita nia fatin no kondisaun, seguransa, alojamentu, lojístika atu akomoda ita nia bainaka sira”, tenik Taur Matan Ruak.
Komemorasaun loron restaurasaun 20 Maiu ba 2019, Taur informa, Ministériu Administrasaun Estatál oras ne’e halo ona preparasaun hodi konsentra selebra iha Dili.
Jornalista: Agapito dos Santos
Editór: Francisco Simões